नांदेड| नांदेड जिल्ह्यात उपलब्ध असलेल्या भक्कम दळणवळणाच्या पायाभूत सुविधा, कृषीवर आधारित उत्पादन क्षमता आणि प्रक्रिया उद्योगांची मोठी ताकद पाहता निर्यातीसाठी अमाप संधी उपलब्ध आहेत. उद्योजकांनी जागतिक बाजारपेठेचे भान ठेवून भविष्यातील धोके ओळखावेत व केंद्र तसेच राज्य शासनाच्या विविध विभागांशी समन्वय साधून नांदेड जिल्ह्याला निर्यातीच्या बाबतीत अग्रस्थानी न्यावे, असे आवाहन जिल्हाधिकारी राहुल कर्डिले यांनी केले.
निर्यात हा देशाच्या अर्थव्यवस्थेचा कणा असून, शासनाच्या विविध योजना व सुविधांचा लाभ घेत ‘लोकल टू ग्लोबल’ या संकल्पनेची प्रभावी अंमलबजावणी करण्यासाठी सर्व उद्योजकांनी पुढाकार घ्यावा, असेही त्यांनी स्पष्ट केले.
जिल्हाधिकारी कार्यालयातील नियोजन भवन येथे आज “महानिर्यात इग्नाईट कन्व्हेंशन २०२६” अंतर्गत आयोजित कार्यशाळेचे उद्घाटन जिल्हाधिकारी राहुल कर्डिले यांच्या हस्ते झाले. या वेळी जिल्हा उद्योग केंद्राचे महाव्यवस्थापक अमोल इंगळे, डाक विभागाचे अधिकारी अक्षय कुलकर्णी, न्यू इंडिया इन्शुरन्सचे चांगदेव शेळके, महाराष्ट्र ग्रामीण बँकेचे पी. डी. मुळे, जिल्हा अग्रणी बँक अधिकारी श्री. सोनकांबळे, ए.यू. स्मॉल फायनान्स बँकेचे अमरजितसिंघ, स्टेट बँक ऑफ इंडियाचे सौरभ कुमार, नांदेड जिल्हा औद्योगिक संघटनेचे अध्यक्ष हर्षद शहा, आनंद बिडवई, निर्यातदार निलेश देशमुख यांच्यासह निर्यातक्षम उद्योगांचे उद्योजक, नवउद्योजक व विविध शासकीय विभागांचे अधिकारी उपस्थित होते.
नांदेड जिल्ह्यात जिल्हा निर्यात केंद्राची निर्मिती करणे व निर्यातीबाबत उद्योजकांमध्ये जागरूकता वाढविणे हा या कार्यशाळेचा मुख्य उद्देश असल्याचे अमोल इंगळे यांनी प्रास्ताविकात सांगितले.
डाक विभागाची निर्यात सुविधा
पंतप्रधान नरेंद्र मोदी यांच्या ‘लोकल टू ग्लोबल’ संकल्पनेच्या पूर्ततेसाठी डाक विभागामार्फत उपलब्ध असलेल्या डाक घर निर्यात केंद्र, डाक पोर्टल नोंदणी व सुलभ निर्यात प्रक्रियेबाबत अधिकारी अक्षय कुलकर्णी यांनी पॉवर पॉईंट सादरीकरणातून सविस्तर माहिती दिली.
उद्योग सुलभतेसाठी मैत्री कक्ष
उद्योग व व्यापार सुलभतेसाठी मैत्री कक्षाअंतर्गत उद्योगांच्या अडचणी एकाच छताखाली सोडविण्याची व्यवस्था असल्याचे अधिकारी धनश्री जाधव व मनोज डोमाणे यांनी ऑनलाईन मार्गदर्शनातून स्पष्ट केले. बँक अधिकाऱ्यांनी कर्जविषयक अडचणी, शासकीय योजनांचा लाभ व उद्योजकांनी सकारात्मक मानसिकतेने पुढे येण्याचे महत्त्व अधोरेखित केले. केळी उत्पादन व निर्यातीचा अनुभव सांगताना निर्यातदार निलेश देशमुख यांनी निर्यातीतील अडचणी, त्यावरील उपाय तसेच गुणवत्तापूर्ण माल पुरविण्याचे महत्त्व स्पष्ट केले.
कार्यशाळेचे आभार प्रदर्शन व्यवस्थापक अनिल कदम यांनी केले. कार्यक्रमाच्या यशस्वी आयोजनासाठी सतीशकुमार चव्हाण, अरविंद भांडे, सोमेश आठवले, एमसीईडीचे अधिकारी व कर्मचाऱ्यांनी मोलाचे योगदान दिले. या कार्यशाळेस सूक्ष्म, लघु व मध्यम उद्योग, निर्यातदार, नवउद्योजक, औद्योगिक संस्था, शेतकरी सहकारी संस्था, प्रक्रिया उद्योग, बँका व विविध शासकीय यंत्रणांचे अधिकारी मोठ्या संख्येने उपस्थित होते. नांदेड जिल्ह्याच्या निर्यात क्षमतेला नवी दिशा देणारी ही कार्यशाळा ठरली असल्याचे मत उपस्थितांनी व्यक्त केले.