नांदेड| महाकवी संत विष्णूदास यांच्या रसाळ आणि भक्तिरसाने ओथंबलेल्या रचनांवर आधारित ‘माहूर गडाची माय रेणुका’ हा भव्य संगीत महोत्सव मंगळवार, दि. २७ जानेवारी रोजी नांदेड येथे आयोजित करण्यात आला आहे.
नांदेड येथील शंकरराव चव्हाण सभागृहात सायंकाळी ५ वाजता या सांस्कृतिक पर्वाला सुरुवात होणार असून, महोत्सवातील रचनांना सुप्रसिद्ध संगीतकार आनंदी विकास यांनी संगीतबद्ध केले आहे.
नांदेड जिल्ह्यातील पवित्र तीर्थक्षेत्र माहूर हे साडेतीन पीठांपैकी एक पूर्ण पीठ मानले जाते. याच माहूर नगरीत महाकवी संत विष्णूदास यांची समाधी असून, त्यांच्या निवडक भक्तिरचनांचा हा संगीत महोत्सव म्हणजे भक्ती, परंपरा आणि संगीताचा सुरेल संगम ठरणार आहे.
या महोत्सवाच्या अध्यक्षस्थानी जिल्हाधिकारी राहुल कर्डिले राहणार असून, मराठी भाषा विभागाचे सचिव किरण कुलकर्णी यांच्या हस्ते उद्घाटन होणार आहे. यावेळी पोलीस अधीक्षक अबिनाश कुमार, मुख्य कार्यकारी अधिकारी मेघना कावली, आयुक्त महेश कुमार डोईफोडे तसेच संपादक शंतनू डोईफोडे यांची विशेष उपस्थिती राहणार आहे.
महाराष्ट्रातील नामांकित गायक, वादक व निवेदकांच्या सहभागाने हा संगीत महोत्सव रसिकांसाठी अविस्मरणीय सांस्कृतिक अनुभूती देणारा ठरणार आहे. या संगीत महोत्सवाचा लाभ घ्यावा, असे आवाहन प्रमुख जिल्हा न्यायाधीश तथा रेणुकादेवी संस्थानचे अध्यक्ष सुनील वेदपाठक यांनी केले आहे.
