Himayatnagar railway station : हिमायतनगर रेल्वे स्थानकावरील विकासकामांवर प्रश्नचिन्ह; प्रवाशांना मूलभूत सुविधांचा अभाव

हिमायतनगर, अनिल मादसवार | शहरातील रेल्वे स्थानकावर कोट्यावधीच्या निधीतून सुरु असलेली विकासकामे अंतिम टप्प्यात असल्याचे सांगितले जात असले, तरी प्रत्यक्षात अनेक त्रुटींमुळे प्रवाशांना मोठ्या अडचणींचा सामना करावा लागत आहे. संबंधित ठेकेदार व रेल्वे प्रशासनाच्या दुर्लक्षामुळे कामाच्या गुणवत्तेबाबत गंभीर प्रश्न उपस्थित होत आहेत.

स्थानकावरील दुसऱ्या क्रमांकाच्या प्लॅटफॉर्मवर अद्याप रेल्वे कोच पोझिशन दर्शविणारे डिजिटल डिस्प्ले बसविण्यात आलेले नाहीत. त्यामुळे कोणती गाडी कोणत्या ठिकाणी थांबणार, याची माहिती प्रवाशांना मिळत नाही. याशिवाय पिण्याच्या पाण्याचीही मोठी समस्या निर्माण झाली असून, प्रवाशांना त्रास सहन करावा लागत आहे.

एक नंबर प्लॅटफॉर्मवर जुन्या बांधकामाला नवीन स्वरूप देण्यात आल्याचे दिसून येते, तर दुरुस्तीच्या कामाचा दर्जा अत्यंत निकृष्ट असल्याची तक्रार आहे. छतामधून पाणी गळत असल्याचेही समोर आले आहे. एकीकडे पाण्याची टंचाई असताना, दुसरीकडे नळांमधून मोठ्या प्रमाणात पाण्याचा अपव्यय होत असल्याचे चित्र दिसते.

सध्या स्थानकावर गाड्यांच्या आगमनाची माहिती देणारे डिजिटल डिस्प्ले नसल्यामुळे प्रवाशांना गाड्यांच्या वेळापत्रकाबाबत अडचणी येत आहेत. तसेच कोरोना काळापासून बंद असलेली पार्सल ऑफिस सेवा अद्याप सुरू करण्यात आलेली नाही.

दरम्यान, सुरू असलेल्या सिमेंट काँक्रीट रस्त्याच्या कामात काही ठिकाणी लोखंडी रॉड उघडेच राहिल्याने प्रवाशांना जखमी होण्याच्या घटना घडत आहेत. काम सुरू असताना पर्यायी व्यवस्था न केल्यामुळे प्रवाशांची गैरसोय वाढली आहे. वाहनतळासाठी शेड उभारण्याचे नियोजन असतानाही.अद्याप ते काम झाले नसल्याने उन्हाळ्यात वाहने तापत असून पावसाळ्यात भिजण्याची शक्यता आहे. त्यामुळे वाहन सुरक्षेचा प्रश्न निर्माण झाला आहे.

स्थानक परिसरात पोलीस चौकी उभारावी, तसेच चोरीच्या घटनांवर नियंत्रण ठेवण्यासाठी योग्य उपाययोजना कराव्यात, अशीही मागणी नागरिकांकडून होत आहे. काही प्रवाशांनी धनबाद एक्सप्रेसला थांबा द्यावा आणि बंद करण्यात आलेली काझीपेठ एक्सप्रेस पुन्हा सुरू करावी, अशी मागणी केली आहे.

एकंदरीत, विकासकामांच्या दाव्यांमध्ये आणि प्रत्यक्ष परिस्थितीत मोठी तफावत दिसून येत असून, रेल्वे प्रशासनाने तातडीने याकडे लक्ष देऊन प्रवाशांना मूलभूत सुविधा उपलब्ध करून द्याव्यात, अशी अपेक्षा व्यक्त होत आहे.

पाहणीनंतरही कामात सुधारणा नाही

हिमायतनगर स्थानकावरील विकासकामांच्या दर्जाबाबत आधीच प्रश्नचिन्ह निर्माण झाले असताना, आता परिस्थिती आणखी गंभीर होत असल्याचे दिसून येत आहे. संबंधित अधिकाऱ्यांच्या पाहणीनंतरही कामात कोणतीही ठोस सुधारणा झालेली नाही.

मागील काळात खासदार नागेश पाटील आष्टीकर यांनी स्थानकाला भेट देऊन सुरू असलेल्या कामांची पाहणी केली होती. यावेळी त्यांनी संबंधित ठेकेदार व अभियंत्यांना कामाचा दर्जा सुधारण्याच्या स्पष्ट सूचना दिल्या होत्या. त्यानंतर विभागीय व्यवस्थापकांनीही स्थानकाला भेट देत परिस्थितीचा आढावा घेत संबंधितांना आवश्यक निर्देश दिले होते.

मात्र, या सर्व पाहण्या आणि सूचनांनंतरही प्रत्यक्षात कामाच्या दर्जात कोणताही फरक पडलेला नाही. उलट, काम पुन्हा त्याच थातूर-मातूर पद्धतीने सुरू असल्याचे स्पष्ट होत आहे. नागरिकांच्या मते, विकासकामांच्या नावाखाली केवळ दिखावा केला जात असून जनतेच्या डोळ्यात धूळफेक केली जात आहे. एकीकडे वरिष्ठ पातळीवरील पाहण्या आणि कडक सूचना, तर दुसरीकडे निकृष्ट दर्जाची कामे — या विरोधाभासामुळे रेल्वे प्रशासनाच्या कार्यपद्धतीवरच प्रश्न उपस्थित होत आहेत.