देगलूर, गंगाधर मठवाले| वारकरी संप्रदायातील थोर संतपुरुष, सद्गुरू श्रीचंद्रशेखर महाराज देगलूरकर यांच्या वाढदिवसानिमित्त त्यांच्या शिष्य परिवाराकडून देगलूर येथील श्री धुंडामहाराज मठ संस्थान येथे दिनांक १७ ऑगस्ट रोजी भव्य रक्तदान शिबिराचे आयोजन करण्यात आले.
या शिबिरात महाराष्ट्र, तेलंगणा आणि कर्नाटक या तीनही राज्यांमधील शिष्यांनी मोठ्या संख्येने सहभाग घेतला. सद्गुरू श्रीचंद्रशेखर महाराज देगलूरकर सेवा मंडळाच्या वतीने आयोजित या शिबिरात ११० पेक्षा अधिक जणांनी रक्तदान करून समाजसेवेचा आदर्श घालून दिला. हा उपक्रम गोळवलकर गुरुजी रक्तकेंद्र, नांदेड यांच्या सहकार्याने यशस्वीपणे पार पडला.
विशेष म्हणजे, श्रावण महिन्यातील उपवास असूनदेखील अनेक मान्यवरांनी रक्तदान करून समाजाप्रती आपली बांधिलकी दाखवली. यामध्ये शिवसेना उपजिल्हाप्रमुख महेश पाटील व माजी नगरसेविका सौ. अनघा महेश पाटील, माजी नगरसेवक दिंगबर कडलवार, हाणमंत कडलवार आदींचा समावेश होता.
यावेळी ऋतुपर्ण चंद्रशेखर महाराज, माजी नगराध्यक्ष मोगलानी शिरशेटवार, शिवसेना तालुकाप्रमुख बालाजी पाटील इंगळे खुतमापुरकर, ह.भ.प. दत्तात्रय जानते सर, ह.भ.प. दामोदर देशाईकेरूरकर, कृष्णा जोशी नळगीरकर, देशमुख पॅथॉलॉजीचे श्रीनिवास देशमुख, श्रीनिवास कुलकर्णी कुन्मारपल्लीकर, शिवाजी पाटील शिंदे, युवासेना शहर समन्वयक संतोष कांबळे, रमाकांत जोशी, विनायक पोतदार, संतोष देगलूरकर आदी मान्यवर उपस्थित होते. या शिबिराचे यशस्वी आयोजन करण्यासाठी ह.भ.प. लक्ष्मीकांत महाराज यांनी विशेष पुढाकार घेतला.
