नांदेड| भारताचे संविधान अंगीकारण्यात आलेल्या 26 नोव्हेंबर दिनाच्या स्मरणार्थ आज श्री गुरू गोबिंदसिंघजी शासकीय औद्योगिक प्रशिक्षण संस्थेत संविधान दिन उत्साहात साजरा करण्यात आला. प्रशिक्षणार्थ्यांमध्ये सामाजिक व नागरी जबाबदारीची जाणीव निर्माण करणे, संविधानिक मूल्यांचा आदर दृढ करणे आणि लोकशाहीप्रती कर्तव्यभाव जागृत करणे हा कार्यक्रमाचा उद्देश होता.
भारतीय संविधानाला 75 वर्षे पूर्ण झाल्याने “संविधान अमृत महोत्सव – घर घर संविधान” या उपक्रमांतर्गत 26 नोव्हेंबर 2025 ते 26 जानेवारी 2026 या कालावधीत विविध स्पर्धा व उपक्रम आयोजित करण्यात येणार आहेत.
कार्यक्रमाची सुरुवात संविधान सन्मान रॅलीने झाली. त्यानंतर संस्थेत संविधान दिनाचे महत्त्व स्पष्ट करणारा कार्यक्रम पार पडला. या प्रसंगी जिल्हा कौशल्य रोजगार व उद्योजकता विभागाचे सहायक आयुक्त डॉ. राजपाल कोल्हे, से.नि. प्राध्यापक डॉ. अनंत राऊत, सोल्युशन करिअर अकॅडमीचे व्यवस्थापक प्रा. शंकर पुरी, से.नि. लेखाधिकारी व्ही. आर. असोरे, सहा. प्रशिक्षणार्थी सल्लागार अन्नपूर्णे पी. के. आदी मान्यवर उपस्थित होते.
औद्योगिक प्रशिक्षण संस्थांमधील विद्यार्थ्यांना तांत्रिक शिक्षणाबरोबरच सामाजिक जबाबदारी, अधिकार व कर्तव्यांची जाणीव व्हावी, यासाठी राज्यातील सर्व आयटीआय संस्थांना महिन्यातून एक सामाजिक प्रबोधनात्मक कार्यक्रम राबविण्याचे आदेश देण्यात आल्याची माहिती यावेळी देण्यात आली.
कार्यक्रमाचे प्रास्ताविक संस्थेचे प्राचार्य तथा जिल्हा व्यवसाय शिक्षण व प्रशिक्षण अधिकारी विश्वंभर कंदलवाड यांनी केले. प्रमुख वक्ते डॉ. अनंत राऊत यांनी संविधानाचे महत्त्व, उद्देशिका आणि भारतीय लोकशाहीची मूल्ये विषद केली. विज्ञानवाद, बुद्धीवाद, राष्ट्रीय प्रतीकांचा सन्मान आणि सत्य-अहिंसेच्या मार्गाचे संवैधानिक महत्त्व त्यांनी स्पष्ट केले.
करिअर मार्गदर्शक प्रा. शंकर पुरी यांनी विद्यार्थ्यांना स्पर्धा परीक्षा तयारी, करिअर नियोजन, तसेच संयम, धैर्य, चिकाटी व सातत्य यांचे महत्त्व सांगितले. कार्यक्रमाचे सूत्रसंचालन पोतदार डी. ए. यांनी केले. आभार प्रदर्शन गटनिदेशक कलंबरकर एम. जी. यांनी केले. राष्ट्रगीताने कार्यक्रमाची सांगता झाली. कार्यक्रम यशस्वी व्हावा यासाठी संस्थेतील सर्व कर्मचारी वर्गाने सहकार्य केले.