हिमायतनगर (वाढोणा), अनिल मादसवार| वैद्यकीय क्षेत्रात आपल्या कर्तृत्वाचा ठसा उमटविण्याच्या दिशेने हिमायतनगरच्या डॉ. सौ. सेजल सुराणा यांनी महत्त्वपूर्ण यश संपादन केले आहे.
एम.डी. (पेडियाट्रिक्स – बालरोगशास्त्र) या पदव्युत्तर वैद्यकीय अभ्यासक्रमाची अंतिम परीक्षा यशस्वीरीत्या उत्तीर्ण होत त्यांनी आपल्या शैक्षणिक कारकिर्दीत मानाचा टप्पा गाठला आहे. त्यांच्या या यशामुळे हिमायतनगरच्या शिरपेचात मानाचा तुरा रोवला गेला असून, श्रीश्रीमाळ कुटुंबाच्या आनंदात भर पडली आहे.
हिमायतनगर येथील रहिवासी आणि श्री परमेश्वर देवस्थानचे उपाध्यक्ष महावीरचंदजी श्रीश्रीमाळ यांच्या नात असलेल्या डॉ. सेजल यांनी मेहनत, जिद्द आणि सातत्यपूर्ण अभ्यासाच्या जोरावर हे यश मिळविले. बालरोगशास्त्रासारख्या महत्त्वपूर्ण वैद्यकीय शाखेत उच्च पदवी संपादन केल्याने बालकांच्या आरोग्यसेवेसाठी त्यांची व्यावसायिक वाटचाल अधिक बळकट झाली आहे.
यशातून उंचावला कुटुंबाचा गौरव! डॉक्टर होण्याचे स्वप्न साकार केल्यानंतर पदव्युत्तर शिक्षणातही यशाची मोहोर उमटविणाऱ्या डॉ. सेजल यांचे हे यश नव्या पिढीतील विद्यार्थ्यांसाठी प्रेरणादायी ठरणारे आहे. त्यांच्या कर्तृत्वामुळे कुटुंबीयांसह नातेवाईक, मित्रपरिवार आणि समाजबांधवांमध्ये आनंदाचे वातावरण निर्माण झाले आहे.
डॉ. सेजल सुराणा यांच्या या उल्लेखनीय यशाबद्दल त्यांचे सर्व स्तरांतून अभिनंदन होत असून, त्यांच्या पुढील वैद्यकीय वाटचालीसाठी शुभेच्छा व्यक्त केल्या जात आहेत. भविष्यात त्यांनी बालरुग्णांची सेवा करत वैद्यकीय क्षेत्रात आणखी उंच भरारी घ्यावी, अशी अपेक्षा व्यक्त होत आहे.
