नांदेड| इमारत व इतर बांधकाम कल्याणकारी मंडळ तसेच महाराष्ट्र कामगार कल्याण मंडळ यांच्या संयुक्त विद्यमाने बाल गंधर्व नाट्य मंदिर ता. मीरज जि. सांगली येथे दि. 26 जुलै 2024 शुक्रवार रोजी सत्कार समारंभ पार पडला. गेल्या दोन वर्षामध्ये कामगार मंत्री म्हणून केलेल्या उल्लेखनीय कार्याबद्दल आयोजित सत्कार समारंभ कार्यक्रमामध्ये राज्यातील सर्व गुणवंत कामगारांना राज्य शासनाच्या इतर विभागाच्या पुरस्कारार्थी प्रमाणे लाभ देणार असल्याची ग्वाही राज्याचे कामगार मंत्री डॉ. सुरेश खाडे यांनी दिली.
राज्य गुणवंत कामगार असोसिएशन यांच्यावतीने गेल्या दोन वर्षामध्ये मंत्री महोदयांच्या मार्गदर्शनाखाली कामगार विभागाने केलेल्या उल्लेखनीय कार्याबद्दल कामगार मंत्री मा.ना. डॉ. सुरेश खाडे, महाराष्ट्र कामगार कल्याण मंडळाचे कल्याण आयुक्त रविराज इळवे व कामगार कल्याण अधिकारी संभाजी पवार यांचा अंबाबाईची मूर्ती, शाल, श्रीफळ देऊन राज्य गुणवंत कामगार असोसिएशन महाराष्ट्र राज्याच्या सर्व जिल्हाध्यक्षांच्या उपस्थितीत सन्मानपूर्वक सत्कार करण्यात आला.
यावेळी सत्काराला उत्तर देताना डॉ. सुरेश खाडे यांनी मंत्री पदाचा पदभार स्वीकारल्यापासून घेतलेल्या अनेक कामगाराभिमुख व समाजाभिमुख चौफेर कार्याचा उल्लेख करुन कामगारांच्या मुलांना उच्चप्रतीचे व दर्जेदार शिक्षण मिळावे यासाठी आपण कटीबद्ध आहोत, त्याचबरोबर यापुढील काळातही समाजसेवेचा वसा अधिक जोमाने सुरु राहील असे सांगितले. तसेच विधानसभा आचारसंहितेपूर्वी कामगार वर्गाच्या उन्नतीसाठी अनेक योजनांची अंमलबजावणी करणार असल्याचे त्यांनी यावेळी सांगितले.कामगार कल्याण मंडळाचे कल्याण आयुक्त रविराज इळवे यांनी आपल्या प्रास्ताविकामध्ये कामगार मंत्र्यांच्या मार्गदर्शनाखाली कामगार विभागामध्ये सध्या सुरु असलेल्या विविध योजना व उपक्रमांची सविस्तर माहिती देऊन यापुढील काळातही संपूर्ण राज्यात नाविण्यपूर्ण योजना राबवून कामगार वर्गाचे सर्वार्थाने हित जोपासले जाईल असे प्रतिपादन केले.
राज्य गुणवंत कामगार असोसिएशनचे राज्य अध्यक्ष सुरेश केसरकर यांनी कामगार मंत्री डॉ. सुरेश खाडे यांनी पदभार स्वीकारल्यापासून राज्यामध्ये सर्व क्षेत्रातील कामगारांच्या हिताचे चांगले निर्णय घेतलेले आहेत. शासनाने लाडकी बहीण, लाडका भाऊ अशा योजनांची अंमलबजावणी करुन समाजातील सर्व घटकांना न्याय देण्याची भूमिका घेतली त्याबद्दल समाधान व्यक्त करुन लाडका गुणवंत कामगार ही योजना सुद्धा राज्यामध्ये लागू करावी अशी आग्रही मागणी त्यांनी यावेळी केली. भारतीय कामगार- कर्मचारी महासंघाचे अध्यक्ष दिलीप जगताप यांनी एक कामगार राज्याचा कामगार मंत्री झाल्याबद्दल समाधान व्यक्त केले व त्यांना शुभेच्छा दिल्या.
सदर कार्यक्रमामध्ये महाराष्ट्र राज्य कामगार कल्याण मंडळाच्यावतीने लाभार्थींना विविध धनादेशाचे वाटप करण्यात आले. त्याचबरोबर इमारत व इतर बांधकाम कामगारांना गृहउपयोगी साहित्याचे तसेच इतर लाभाच्या योजनांचे धनादेश कामगार मंत्री डॉ. सुरेश खाडे व कल्याण आयुक्त रविराज ईळवे यांच्या हस्ते प्रदान करण्यात आले. कार्यक्रमाची सुरुवात महाराष्ट्र गीताने व मान्यवरांच्या हस्ते दीप प्रज्वलीत करुन करण्यात आले. तर कार्यक्रमाची सांगता राष्ट्रगीताने करण्यात आली.
यावेळी प्रमुख उपस्थिती म्हणून भारतीय कर्मचारी महासंघाचे दिलीपदादा जगताप, राज्य गुणवंत कामगार असोसिएशनचे राज्याध्यक्ष सुरेश केसरकर, नांदेड जिल्ह्याचे गुणवंत एच. मिसलवाड, रत्नाकर शिंदे, पंडीत तेलंग, विजय रणखांब, रामदास पेंडकर, प्रभाकर कांबळे, संजय सुर्वे, अनिता काळे, संजय सासणे, महादेव चक्के, प्रताप घेवडे, दिलीप घोलप, दत्तात्रय शिरोडकर, साधना भगत, गोविंदराव पाचपोर, नारायण धनगर, विजय आरेकर, शिवाजी चौगुले, प्रशांत उपाध्ये, भास्कर शिंदे, दिनकर आडसुळ आदी 36 जिल्ह्यातील गुणवंत कामगार, स्थानिक नगरसेवक, विविध संघटनांचे कामगार प्रतिनिधी व प्रशासकीय अधिकारी यांची प्रमुख उपस्थिती म्हणून मोठ्या संख्येने उपस्थित होते. सदर कार्यक्रमास जवळपास दोन हजारापेक्षा जास्त कामगार- कर्मचारी उपस्थित होते. कार्यक्रमाचे निवेदन सौ. परब यांनी केले तर आभार सहाय्यक कामगार आयुक्त मुजावर यांनी मानले. सदर कार्यक्रम यशस्वी करण्यासाठी प्रभारी सहाय्यक कल्याण आयुक्त मनोज पाटील, कामगार कल्याण अधिकारी संभाजी पवार, सर्व केंद्र संचालक व दोन्ही विभागाचा सर्व स्टॉफ यांनी अविरतपणे प्रयत्न केले.
