हिमायतनगर, अनिल मादसवार| “पद येतील-जातील; मात्र समाजाचा न्याय आणि स्वाभिमान सर्वांत मोठा!” अशी स्पष्ट भूमिका घेत राष्ट्रवादी काँग्रेस पक्षाचे हिमायतनगर तालुकाध्यक्ष वामनराव पाटील वडगावकर यांनी आपल्या तालुकाध्यक्षपदाचा राजीनामा दिला आहे. मराठा समाजाच्या न्यायासाठी मनोज जरांगे पाटील यांच्या नेतृत्वाखाली सुरू असलेल्या संघर्षाला जाहीर समर्थन देत त्यांनी हा निर्णय घेतल्याचे आपल्या राजीनामा पत्रातून स्पष्ट केले आहे.
सत्ताधारी पक्षाचा तालुकाध्यक्ष म्हणून काम करत असताना समाजाच्या न्यायाच्या प्रश्नावर गप्प बसणे आपल्याला मान्य नसल्याचे पाटील यांनी म्हटले आहे. “समाजाच्या हक्कासाठी ठाम भूमिका घ्यायची असेल, तर पदाला चिकटून राहण्यापेक्षा पदाचा राजीनामा देऊन संघर्षात सहभागी होणे योग्य,” अशी भूमिका त्यांनी मांडली आहे.
हिमायतनगरमध्ये राष्ट्रवादीला बळकटी देण्यासाठी आक्रमक काम – वामनराव पाटील वडगावकर यांनी हिमायतनगर तालुक्यात राष्ट्रवादी काँग्रेस पक्षाच्या वाढीसाठी सातत्याने आंदोलने, उपोषणे आणि विविध जनहिताच्या प्रश्नांवर संघर्ष केला. सर्वसामान्य नागरिकांना शासनाच्या योजनांचा लाभ मिळावा, यासाठी त्यांनी प्रशासनाकडे पाठपुरावा केला.
नगरपंचायत निवडणुकीच्या काळातही त्यांनी पक्षाच्या संघटनात्मक बांधणीसाठी महत्त्वाची भूमिका बजावल्याचा दावा त्यांच्या समर्थकांकडून केला जात आहे. शेतकरी, सर्वसामान्य नागरिक आणि विकासाच्या प्रश्नांवर त्यांनी आक्रमक भूमिका घेत प्रशासनातील कथित गैरप्रकार व भ्रष्टाचाराविरोधात आवाज उठवला, त्यामुळे तालुक्यात त्यांची रोखठोक कार्यकर्ता अशी ओळख निर्माण झाल्याचे समर्थक सांगतात.
राजीनाम्यामुळे राजकीय वर्तुळात चर्चेला उधाण
एकीकडे सत्ताधारी पक्षाची जबाबदारी आणि दुसरीकडे समाजाच्या प्रश्नावर संघर्ष, या दोन्हीमध्ये त्यांनी समाजाच्या न्यायाला प्राधान्य दिल्याने त्यांच्या राजीनाम्याची हिमायतनगरच्या राजकीय वर्तुळात जोरदार चर्चा सुरू झाली आहे.
“सत्तेच्या सावलीत राहण्यापेक्षा समाजाच्या हक्कासाठी रस्त्यावर उतरणे पसंत केले,” असा संदेश या निर्णयातून गेल्याची प्रतिक्रिया त्यांच्या समर्थकांकडून व्यक्त होत आहे.
मराठा समाजाच्या प्रश्नावर घेतलेल्या या निर्णयामुळे वामनराव पाटील वडगावकर यांच्या भूमिकेचे समर्थकांकडून कौतुक होत असून, ‘निडर, धाडसी आणि रोखठोक नेतृत्व’ अशी भावना व्यक्त केली जात आहे. पदाचा त्याग करून समाजाच्या न्यायासाठी संघर्षाची वाट निवडल्याने वडगावकरांच्या राजीनाम्याने हिमायतनगरच्या राजकारणात नवा राजकीय संदेश दिला आहे.🔥 एक मराठा, लाख मराठा! 🔥
