हिमायतनगर, प्रतिनिधी| तालुक्यातील वाईवाडी येथील शेतकरी तथा भारुडी-भजन सम्राट मुकुंदराव सटवा नखाते (वय ५६) यांचा विषारी सापाच्या दंशाने उपचारादरम्यान दुर्दैवी मृत्यू झाला. त्यांच्या आकस्मिक निधनाने वाईवाडीसह परिसरात हळहळ व्यक्त होत असून, भजन-भारुडी क्षेत्राने एक हसतमुख व कलाप्रेमी व्यक्तिमत्त्व गमावले आहे.
मिळालेल्या माहितीनुसार, मुकुंदराव नखाते हे २५ ऑगस्ट रोजी दिवसभर शेतात काम करून सायंकाळच्या सुमारास बैल चारविण्यासाठी शेत परिसरात गेले होते. यावेळी त्यांना विषारी सापाने दंश केला. सर्पदंश झाल्याचे लक्षात येताच कुटुंबीय व परिसरातील नागरिकांनी तातडीने प्रथमोपचार करून पुढील उपचारासाठी त्यांना नांदेड येथे हलविले.
मात्र, त्यांची प्रकृती गंभीर असल्याने उपचार सुरू असतानाच २६ ऑगस्ट रोजी सकाळी सुमारे सहा वाजता त्यांची प्राणज्योत मालवली. त्यांच्या निधनाची बातमी समजताच नातेवाईक, मित्रपरिवार तसेच परिसरातील नागरिकांमध्ये शोककळा पसरली.
भारुडी-भजनातून समाजप्रबोधन करणारे कलाकार
मुकुंदराव नखाते हे शेती व्यवसायासोबतच भारुडी आणि भजनाच्या माध्यमातून समाजप्रबोधन करणारे कलाकार म्हणून परिसरात परिचित होते. आपल्या कलेच्या माध्यमातून त्यांनी सामाजिक संदेश देत जनजागृती करण्याचे काम केले. त्यांच्या निधनामुळे भजन-भारुडी क्षेत्रासह शेतकरी वर्गातूनही हळहळ व्यक्त होत आहे.
त्यांच्या आकस्मिक निधनाने नखाते कुटुंबावर दुःखाचा डोंगर कोसळला आहे. त्यांच्या पश्चात आई, पत्नी, दोन मुले, एक मुलगी, सुना आणि नातवंडे असा परिवार आहे. दरेसरसम येथील माजी सरपंच रामराम पाटील भिसे यांचे ते मेव्हणे होत.
मुकुंदराव नखाते यांच्यावर बुधवारी सायंकाळी वाईवाडी येथे शोकाकुल वातावरणात अंत्यसंस्कार करण्यात आले. यावेळी नातेवाईक, मित्रपरिवार, ग्रामस्थ तसेच भजन-भारुडी क्षेत्रातील अनेकांनी उपस्थित राहून त्यांना भावपूर्ण श्रद्धांजली अर्पण केली.
