नांदेड| स्थानिक गुन्हे शाखेच्या पथकाने प्रभावी कारवाई करत घरफोडी प्रकरणातील दोन आरोपींना अटक करून त्यांच्या ताब्यातून तब्बल २ लाख २५ हजार ५०० रुपयांचे सोन्याचे व चांदीचे दागिने जप्त केले आहेत.
ही कारवाई पोलीस अधीक्षक यांच्या मार्गदर्शनाखाली स्थानिक गुन्हे शाखेच्या पथकाने केली. अटकेत असलेल्या आरोपींमध्ये अब्दुल उस्मान अब्दुल समी (वय 26, रा. खुडवेदनगर, नांदेड) शेख मोमीन शेख रशीद (वय 25, रा. मालेगाव रोड परिसर, नांदेड) यांचा समावेश आहे.
पोलिसांनी दिलेल्या माहितीनुसार, या आरोपींनी विविध ठिकाणी घरफोडी करून सोन्याचे दागिने चोरल्याची कबुली दिली आहे. त्यांच्या ताब्यातून १० ग्रॅम वजनाचे १० दागिने (१,४५,००० रु.), ४ ग्रॅम सोन्याचे दागिने (५६,००० रु.) आणि ६ ग्रॅम वजनाचे दागिने (२४,५०० रु.) असा एकूण मुद्देमाल जप्त करण्यात आला.
ही कारवाई स्थानिक गुन्हे शाखेचे पोलीस निरीक्षक व पथकाने तांत्रिक माहितीच्या आधारे सापळा रचून केली. या प्रकरणाचा पुढील तपास सुरू असून, आणखी गुन्ह्यांचा उलगडा होण्याची शक्यता पोलिसांनी व्यक्त केली आहे. नांदेड पोलिसांची ही धडक कारवाई गुन्हेगारांसाठी मोठा इशारा ठरली आहे.
