नवीन नांदेड | गोदावरी नदी पात्रातील अवैध रेती उपसा व साठवणुकीवर नांदेड ग्रामीण पोलिसांनी मोठी कारवाई करत तब्बल ७ लाख २५ हजार रुपयांचा मुद्देमाल जप्त केला आहे. या धाडसी कारवाईबद्दल वरिष्ठ अधिकाऱ्यांनी पथकाचे कौतुक केले आहे.
Godavari River पात्रातून इंजिन व तराफ्याच्या साहाय्याने अवैध रेती उपसा करून ती नदीकाठी साठवून ठेवण्यात येत असल्याची गोपनीय माहिती पोलिसांना मिळाली होती. त्यानुसार Vishnupuri Project जवळील असर्जन शिवारात छापा टाकण्यात आला.
Avinash Kumar, पोलीस अधीक्षक नांदेड यांनी “ऑपरेशन फ्लश आऊट” अंतर्गत अवैध गौण खनिज उत्खनन व वाहतुकीवर कडक कारवाईचे आदेश दिले होते. त्यानुसार Nanded Rural Police Station चे पोलीस निरीक्षक ओमकांत चिंचोलकर यांच्या मार्गदर्शनाखाली २२ फेब्रुवारी २०२६ रोजी रात्री पेट्रोलिंगदरम्यान ही कारवाई करण्यात आली.
सकाळी अंदाजे ११ वाजण्याच्या सुमारास नदी पात्रात छापा टाकला असता दोन अनोळखी आरोपी पोलिसांना पाहून पळून गेले. घटनास्थळी आढळलेले तराफे व इंजिन पंचनामा करून जागीच तोडून नष्ट करण्यात आले. तसेच नदीकिनारी साठवून ठेवलेली रेती जप्त करून पोलीस ठाण्यात जमा करण्यात आली.
या प्रकरणी दोन अनोळखी आरोपींविरुद्ध भारतीय न्याय संहिता कलम ३०३(२), ३(५), महाराष्ट्र जमीन महसूल अधिनियम कलम ४८(७), ४८(८), पर्यावरण संरक्षण अधिनियम कलम ९ व १५ तसेच सार्वजनिक संपत्ती नुकसान प्रतिबंधक अधिनियम कलम ३ व ७ अन्वये गुन्हा दाखल करण्यात आला आहे. अवैध रेती माफियांवर सातत्याने कारवाई सुरू राहणार असल्याचा इशारा पोलिसांनी दिला असून, पर्यावरण व सार्वजनिक संपत्तीचे संरक्षण करण्यासाठी अशा मोहिमा पुढेही राबविण्यात येणार असल्याचे स्पष्ट करण्यात आले आहे.