नांदेड| शेतकऱ्यांनी पारंपारिक पिकांऐवजी रेशीम शेतीला प्राधान्य दिल्यास अधिक व निरंतर उत्पन्न मिळू शकते. आवश्यक तांत्रिक कौशल्य आत्मसात करून प्रायोगिक तत्त्वावर रेशीम शेती सुरू करावी व जास्तीत जास्त शेतकऱ्यांनी नवीन तुती लागवडीसाठी नोंदणी करून रेशीम शेतीकडे वळावे, असे आवाहन जिल्हाधिकारी राहुल कर्डिले यांनी केले.
महारेशीम अभियान 2026 अंतर्गत आज जिल्हाधिकारी कार्यालयात फिरत्या जनजागृती वाहनाचा शुभारंभ जिल्हाधिकारी राहुल कर्डिले यांच्या हस्ते हिरवी झेंडी दाखवून करण्यात आला. यावेळी परिविक्षाधीन आयपीएस अधिकारी एन. एम. शशीकांत, निवासी उपजिल्हाधिकारी किरण अंबेकर, उपजिल्हाधिकारी संजीव मोरे, उपजिल्हाधिकारी श्री. कोळेकर, उपमुख्य कार्यकारी अधिकारी (पं. मनरेगा) अमित राठोड, रेशीम अधिकारी पी. बी. नरवाडे, तांत्रिक अधिकारी कांचन जाधव, रेशीम शेती करणारे शेतकरी तसेच जिल्हाधिकारी कार्यालयातील अधिकारी-कर्मचारी उपस्थित होते.
जिल्हाधिकारी कर्डिले म्हणाले की, नांदेड जिल्ह्यातील हवामान रेशीम शेतीस अत्यंत अनुकूल आहे. लोहा तालुक्यात रेशीम शेती यशस्वीपणे सुरू असून सध्या जिल्ह्यात 500 ते 600 रेशीम शेतकरी कार्यरत आहेत. पारंपारिक पिकांना सक्षम पर्याय म्हणून रेशीम शेती अनेक दृष्टीने फायदेशीर ठरत आहे. जालना व बीड येथे बाजारपेठ उपलब्ध, वन्यप्राण्यांचा त्रास नाही, रोगराईचे प्रमाण कमी, निरंतर उत्पन्न आणि मनरेगा अंतर्गत अनुदान मिळत असल्याने रेशीम शेती अल्प कालावधीत सातत्यपूर्ण उत्पन्न देणारी ठरते, असे त्यांनी नमूद केले.
यावेळी जिल्हाधिकारी राहुल कर्डिले यांनी धनगरवाडी येथील रेशीम शेतकऱ्यांशी संवाद साधून उत्पन्नाबाबत माहिती घेतली. यामध्ये शेतकरी बालाजी काळे यांनी अवघ्या एका महिन्यात 1 लाख 76 हजार रुपयांचे उत्पन्न मिळवल्याबद्दल त्यांचा सत्कार करण्यात आला. तसेच महारेशीम अभियान 2026 च्या घडीपत्रिकेचे प्रकाशन करण्यात आले. सन 2025-26 मध्ये शेतकऱ्यांनी समूहाने मनरेगा, सिल्क समग्र-2, पोकरा योजना तसेच वैयक्तिक स्वरूपात नवीन तुती लागवडीसाठी नोंदणी करावी, असे आवाहन यावेळी करण्यात आले.
नोंदणी व माहितीसाठी संपर्क : जिल्हा रेशीम कार्यालय, रामाकृष्णा इमारत, दुसरा मजला, एम. एफ. होंडा शोरूमच्या बाजूला, जॉन डिअर ट्रॅक्टर सर्व्हिस सेंटरसमोर, हिंगोली रोड, नांदेड. दूरध्वनी : 9561714145, 7798213333, 9763347777, 8625044438, 7219023328