भोकर, साई चौहान| उपविभागीय अधिकारी प्रवीण मेंगशेट्टी यांच्या मार्गदर्शनाखाली राबविलेल्या विद्यार्थ्योदय अभियानाअंतर्गत भोकर तालुक्यातील जिल्हा परिषदेच्या शाळांत विजेची सोय झाल्याने शाळा प्रकाशमय झाल्या.आणि प्रत्येक वर्गात पंखे बसविण्यात आले आहेत. यानंतर रंगरंगोटी, विविध सुविधा, गुणवत्ता बाबत काम होणार आहेत.
मागील अनेक वर्षापासून दुर्लक्षित झालेल्या जिल्हा परिषदेच्या शाळेंचे विज बिल थकल्याने महावितरणने अनेक ठिकाणचा वीज पुरवठा खंडित केला होता.तर काही शाळांना अद्यापपर्यंत वीज कनेक्शनच मिळाले नाही. मधल्या काळात काही शाळा डिजिटल झाल्या. मात्र वीजच नसल्याने शाळा डिजिटल कशा होणार. भोकर तालुक्यातील जिल्हा परिषदच्या शाळांना वीज उपलब्ध करून देण्यासाठी उपविभागीय अधिकारी प्रवीण मेंगशेट्टी यांनी विद्यार्थ्योदय अभियान हाती घेतले.
या अभियानात अंतर्गत फेब्रुवारी पासून तालुक्यातील सर्व शाळेत वीज जोडणी काम हाती घेण्यात आले. आणि हे काम पूर्णत्वास गेले. यासोबतच सर्व वर्गात पंखे बसविण्यात आले. यामुळे भोकर तालुक्यातील शाळा प्रकाशमय झाल्या आणि बालकांना पंख्याची सोय झाली. या अभियानात उपविभागीय अधिकारी प्रवीण मेंगशेट्टी सोबत गटशिक्षणाधिकारी सुधीर गुट्टे, विद्युत वितरण कंपनी उपकार्यकारी अभियंता भुषण आचार्य, सेवा समर्पण परिवारचे विठ्ठल फुलारी यांनी महत्त्वाची भूमिका बजावली. विद्यार्थ्योदय अभियान अंतर्गत जिल्हा परिषदेच्या सर्व शाळेत वीज आणि पंखा असलेला मराठवाड्यातील एकमेव तालुका म्हणून भोकर असेल. यानंतर या सर्व शाळेत रंगरंगोटी, विविध सुविधा, गुणवत्ता बाबत काम सुरू करणार असल्याचे सांगण्यात आले.
कुठे ग्रामपंचायत तर कुठे पदरमोड..
भोकर तालुक्यातील जिल्हा परिषदेच्या शाळेत वीज बील भरण्यासाठी सर्व ग्रामपंचायतकडून थकीत वीज बील भरले गेले, पंखे दिले गेले. भोकर शहरातील शाळांना पंखे देण्यासाठी तालुक्यातील अधिकाऱ्यांनी पदरमोड केली आणि स्वखर्चाने पंखे खरेदी करून शाळेना भेट दिली. तर बोरगाव येथील शाळेत सेवा समर्पण परिवार ने पंखे दिले.