नांदेड| शासकीय प्रशासनात कार्यक्षमतेचा स्तर उंचावण्यासाठी कृतीम बुद्धिमत्ता तंत्रज्ञानाचा प्रभावी वापर व्हावा, यासाठी नांदेड जिल्हा परिषदेच्या वतीने एकदिवसीय कार्यशाळेचे आयोजन करण्यात आले. जिल्हा परिषदेच्या यशवंतराव चव्हाण सभागृहात अधीक्षक, सहाय्यक प्रशासन अधिकारी आणि कनिष्ठ प्रशासन अधिकारी यांच्यासाठी आज कार्यशाळा घेण्यात आली.
या कार्यशाळेस जिल्हा परिषदेचे अतिरिक्त मुख्य कार्यकारी अधिकारी संदीप माळोदे, सामान्य प्रशासन विभागाचे उपमुख्य कार्यकारी अधिकारी राजकुमार मुक्कावार, पाणी व स्वच्छता विभागाचे उपमुख्य कार्यकारी अधिकारी नारायण मिसाळ, नरेगाचे उपमुख्य कार्यकारी अधिकारी अमित राठोड आदी उपस्थित होते.
कार्यशाळेच्या उद्घाटन प्रसंगी बोलताना अतिरिक्त मुख्य कार्यकारी अधिकारी संदीप माळोदे यांनी सांगितले की, प्रशासकीय कामकाज अधिक सहज, सुलभ व परिणामकारक करण्यासाठी कृतीम बुद्धिमत्तेचा वापर अत्यंत उपयुक्त ठरतो. डिजिटल युगात प्रशासनाला सक्षम करण्यासाठी सर्व कर्मचाऱ्यांनी या तंत्रज्ञानाचा सकारात्मक वापर करावा, असे आवाहन त्यांनी केले.
कार्यशाळेमध्ये पुणे येथील एमकेसीएलचे विभागीय आयुक्त विनायक कदम यांनी सविस्तर तांत्रिक मार्गदर्शन केले. त्यांनी प्रत्यक्ष ऑनलाइन उदाहरणांद्वारे कृतीम बुद्धिमत्ता आधारित विविध अनुप्रयोगांची माहिती दिली. त्यांच्या सादरीकरणाला उपस्थित कर्मचाऱ्यांनी उत्स्फूर्त प्रतिसाद दिला.
कार्यशाळेला नांदेड येथील एमकेसीएलचे जिल्हा व्यवस्थापक पंढरीनाथ आघाव व जिल्हा परिषदेच्या माहिती व तंत्रज्ञान विभागाचे जिल्हा प्रकल्प प्रमुख कुलदीप जोशी यांचीही उपस्थिती होती. या कार्यक्रमाचे प्रास्ताविक उपमुख्य कार्यकारी अधिकारी राजकुमार मुक्कावार यांनी केले. सूत्रसंचालन मिलिंद व्यवहारे यांनी तर आभार प्रदर्शन पांपटवार यांनी केले. या कार्यशाळेच्या माध्यमातून जिल्हा परिषदेच्या प्रशासकीय यंत्रणेमध्ये डिजिटल परिवर्तन व आधुनिक तंत्रज्ञानाचा प्रभावी वापर घडून येईल, असा विश्वास उपस्थित कर्मचाऱ्यांनी व्यक्त केला.