हिमायतनगर, अनिल मादसवार| हिमायतनगर नगरपंचायतीच्या नवनिर्वाचित नगराध्यक्ष रफिक सेठ यांच्या पदग्रहण सोहळ्याने शहरात राजकीय व सामाजिक उत्साहाचे वातावरण निर्माण झाले. माजी आमदार माधवराव पाटील जवळगावकर यांच्या प्रमुख उपस्थितीत हा पदभार स्वीकारण्याचा ऐतिहासिक क्षण साजरा करण्यात आला.
गुरुवार, दि. ८ जानेवारी २०२६ रोजी सकाळी ११ वाजता नगराध्यक्ष रफिक सेठ यांच्या निवासस्थानापासून फटाक्यांच्या आतषबाजीत व घोषणांनी दणदणीत भव्य रॅली नगरपंचायत कार्यालया पर्यंत काढण्यात आली. या रॅलीने शहरातील प्रमुख मार्गांवरून मार्गक्रमण करत संपूर्ण हिमायतनगरचे लक्ष वेधून घेतले.
यानंतर नगरपंचायत कार्यालयाच्या प्रांगणात आयोजित पदग्रहण सोहळा मोठ्या थाटात पार पडला. यावेळी मंचावर माजी आमदार माधवराव पाटील जवळगावकर, श्री परमेश्वर मंदिर ट्रस्ट कमिटीचे उपाध्यक्ष महावीरचंद श्रीश्रीमाळ, नवनिर्वाचित नगरसेवक, विविध पक्षांचे पदाधिकारी, सामाजिक कार्यकर्ते व नागरिक मोठ्या संख्येने उपस्थित होते.
कार्यक्रमाच्या प्रारंभी नगरपंचायतीचे प्रभारी मुख्याधिकारी श्री. ताडेवाड यांच्या हस्ते नगराध्यक्ष शेख रफिक शेख महेबूब यांच्यासह सर्व मान्यवर व नवनिर्वाचित नगरसेवकांचा स्वागत-सन्मान करण्यात आला. त्यानंतर लोकनियुक्त नगराध्यक्ष शेख रफिक सेठ यांनी विधिवत पदभार स्वीकारला. या ऐतिहासिक क्षणाचे साक्षीदार होण्यासाठी शहरासह ग्रामीण भागातून नागरिकांनी मोठी गर्दी केली होती.
यावेळी मार्गदर्शन करताना माजी आमदार माधवराव पाटील जवळगावकर यांनी सांगितले की, “हिमायतनगर शहरात मागील काळात रखडलेली सर्व विकासकामे येत्या पाच वर्षांत नवनिर्वाचित नगराध्यक्ष व नगरसेवक पूर्ण करतील आणि जनतेने दाखवलेला विश्वास नक्कीच सार्थ ठरवतील.” त्यांनी नगराध्यक्ष रफिक सेठ व सर्व नगरसेवकांचे अभिनंदन करत पुढील वाटचालीस शुभेच्छा दिल्या.
नव्या नेतृत्वाकडून शहराच्या सर्वांगीण विकासाची अपेक्षा नागरिकांनी व्यक्त केली असून, रखडलेली विकासकामे मार्गी लागून मूलभूत सुविधा सक्षम होतील, असा विश्वास उपस्थित नागरिकांनी व्यक्त केला. नवनिर्वाचित नगराध्यक्ष व नगरसेवक आगामी काळात कोणत्या पद्धतीने शहराच्या विकासाला चालना देतात, याकडे संपूर्ण हिमायतनगरचे लक्ष लागून आहे.
