हिमायतनगर | हिमायतनगर तालुक्यातील सिरंजनी येथील शेतकरी कुटुंबातील होतकरू युवक प्रज्वल नर्सिंग पिस्केवार याने वैद्यकीय क्षेत्रातील एमबीबीएस (MBBS) पदवी परीक्षेत प्रथम श्रेणीसह विशेष प्राविण्य मिळवत घवघवीत यश संपादन केले आहे. अत्यंत प्रतिकूल परिस्थितीवर मात करत मिळवलेल्या या यशामुळे संपूर्ण तालुक्यात त्याचे कौतुक होत आहे.
प्रज्वलचे प्राथमिक शिक्षण सिरंजनी येथील जिल्हा परिषद शाळेत झाले. ग्रामीण भागात शिक्षण घेत असतानाही त्याने वैद्यकीय क्षेत्रात करिअर करण्याचे स्वप्न पाहिले आणि जिद्द, चिकाटी व कठोर परिश्रमाच्या जोरावर ते स्वप्न पूर्ण केले.
त्याने बी. के. एल. वालावलकर ग्रामीण वैद्यकीय महाविद्यालय, रुग्णालय व संशोधन केंद्र, डेरवण (ता. चिपळूण, जि. रत्नागिरी) येथे एमबीबीएसचे शिक्षण पूर्ण केले असून सन २०२५ मध्ये एमबीबीएस परीक्षा प्रथम श्रेणीत उत्तीर्ण होत डॉक्टरी क्षेत्रात यशस्वी पाऊल टाकले आहे.
शेतकरी कुटुंबात जन्मलेल्या प्रज्वलने आपल्या यशाचे श्रेय आई-वडील, आजी-आजोबा, मार्गदर्शक शिक्षक व मित्रपरिवाराच्या पाठबळाला दिले. “शेतकरी कुटुंबात राहूनही जिद्द आणि मेहनत असेल तर कोणतेही शिखर सर करता येते,” असे मत त्याने व्यक्त केले.
डॉ. प्रज्वल पिस्केवार हे सिरंजनी येथील सेवा सहकारी सोसायटीचे विद्यमान चेअरमन तथा माजी उपसरपंच बब्रुवाहन भूमाजी गड्डमवार यांचे नातू आहेत. त्यांच्या या यशामुळे सिरंजनी गावाच्या शिरपेचात मानाचा तुरा रोवला गेला असून परिसरातून त्यांच्यावर अभिनंदनाचा वर्षाव होत आहे.
