हिमायतनगर (वाढोणा), अनिल मादसवार| ग्रामीण भागातील जिल्हा परिषद शाळाही शिस्त, स्वच्छता आणि गुणवत्तापूर्ण शिक्षणाच्या बळावर आदर्श ठरू शकतात, याचा प्रत्यय हिमायतनगर तालुक्यातील सवना येथील जिल्हा परिषद केंद्रीय प्राथमिक शाळेला भेट दिल्यानंतर आला. शाळेतील स्वच्छता, विद्यार्थ्यांची शैक्षणिक गुणवत्ता, आकर्षक शैक्षणिक वातावरण आणि शिक्षकांचे समर्पित कार्य पाहून श्री परमेश्वर मंदिर देवस्थान ट्रस्ट कमिटीचे उपाध्यक्ष महावीरचंद श्रीश्रीमाळ यांनी समाधान व्यक्त केले. “शाळेला सुचवण्यासारखे काहीच दिसत नाही!” अशा शब्दांत त्यांनी शाळेच्या कामकाजाची प्रशंसा केली. शिवाय, शाळेच्या भौतिक सुविधांच्या विकासासाठी देवस्थान ट्रस्ट कमिटी आणि श्रीश्रीमाळ परिवाराकडून सर्वतोपरी आर्थिक सहकार्य करण्याची ग्वाही दिली.
दि. १९ ऑक्टोबर रोजी झालेल्या या सदिच्छा भेटीदरम्यान श्रीश्रीमाळ यांनी शाळेतील शैक्षणिक, भौतिक आणि प्रशासकीय व्यवस्थेची सविस्तर पाहणी केली. प्रत्येक वर्गात जाऊन विद्यार्थ्यांशी संवाद साधत त्यांच्या अध्ययनाची आणि शैक्षणिक प्रगतीची माहिती घेतली. शाळेतील आकर्षक शैक्षणिक भित्तिचित्रे, बोलक्या भिंती, विज्ञान व गणित विषयांचे साहित्य आणि कृतीतून शिक्षण देण्यासाठी उपलब्ध करून दिलेल्या सुविधांनी ते विशेष प्रभावित झाले.
शिस्त, स्वच्छता अन् गुणवत्तेचा आदर्श! शाळेतील वर्गखोल्यांची व्यवस्था, कार्यालयीन कामकाज, प्रशासकीय नियोजन, शालेय पोषण आहाराच्या भांडारगृहातील स्वच्छता, साहित्याची नीटनेटकी मांडणी आणि नवीन वर्गखोल्यांतील आकर्षक रंगरंगोटीची त्यांनी पाहणी केली. विद्यार्थ्यांना केवळ पुस्तकी ज्ञान न देता प्रयोग, कृती आणि शैक्षणिक साहित्याच्या माध्यमातून शिकविण्यासाठी शिक्षक घेत असलेले परिश्रम त्यांना भावले.
मुख्याध्यापक सतीश परमेश्वर गोपतवाड आणि त्यांच्या सहकारी शिक्षकांनी विद्यार्थ्यांच्या सर्वांगीण विकासासाठी निर्माण केलेले शैक्षणिक वातावरण कौतुकास्पद असल्याचे श्रीश्रीमाळ यांनी नमूद केले. शाळेच्या व्यवस्थापनात शिस्त, स्वच्छता आणि गुणवत्तेला दिलेले महत्त्व पाहता त्यांनी समाधान व्यक्त केले.
नांदेड जिल्ह्यात प्रथम क्रमांक मिळविण्याचे ध्येय! “सवना शाळेने शैक्षणिक गुणवत्ता, शिस्त, स्वच्छता आणि विद्यार्थ्यांच्या सर्वांगीण विकासाच्या बाबतीत नांदेड जिल्ह्यात प्रथम क्रमांक मिळवावा,” अशी अपेक्षा महावीरचंद श्रीश्रीमाळ यांनी व्यक्त केली. त्यांच्या या कौतुकपूर्ण शब्दांमुळे मुख्याध्यापक आणि शिक्षकवृंदाच्या कार्याला नवी ऊर्जा मिळाली आहे.
शाळेच्या पुढील वाटचालीत आवश्यक असलेल्या भौतिक सुविधांची उभारणी आणि सुधारणांसाठी देवस्थान ट्रस्ट कमिटी तसेच श्रीश्रीमाळ परिवाराकडून शक्य ते आर्थिक सहकार्य करण्यात येईल, अशी ग्वाहीही त्यांनी दिली. शाळेच्या कामकाजाची माहिती सातत्याने घेण्यासह वेळोवेळी भेट देण्याची इच्छाही त्यांनी व्यक्त केली.
लोकसहभागातून शाळेच्या विकासाला बळ – ग्रामीण भागातील विद्यार्थ्यांना गुणवत्तापूर्ण शिक्षण मिळावे, जिल्हा परिषद शाळांवरील समाजाचा विश्वास अधिक दृढ व्हावा आणि शाळांच्या विकासासाठी लोकसहभाग वाढावा, या दृष्टीने ही भेट महत्त्वपूर्ण ठरली आहे. शाळेच्या कामाची दखल घेत केवळ कौतुक न करता भौतिक विकासासाठी सहकार्याची ग्वाही देणे, ही सवना शाळेच्या प्रगतीसाठी सकारात्मक बाब मानली जात आहे.
या वेळी सेवानिवृत्त मुख्याध्यापक नागनाथराव अक्कलवाड, सचिव अनंतराव देवकते, संचालक संजय माने, विलास वानखेडे, रामभाऊ सूर्यवंशी, सोनबा राऊत, सुभाषराव गायकवाड, सिद्धार्थ राऊत, शिवानंद बिरकलवार आणि पांडुरंग काळबांडे उपस्थित होते.
शाळेच्या नवनिर्माणाला मिळालेली कौतुकाची दाद, गुणवत्तापूर्ण शिक्षणाला मिळालेली प्रशंसा आणि आर्थिक सहकार्याच्या आश्वासनामुळे सवना जिल्हा परिषद केंद्रीय प्राथमिक शाळेच्या विकासाला नवी दिशा मिळण्याची अपेक्षा व्यक्त होत आहे. या सदिच्छा भेटीबद्दल आणि सहकार्याच्या भूमिकेबद्दल मुख्याध्यापक सतीश परमेश्वर गोपतवाड यांनी महावीरचंद श्रीश्रीमाळ यांचे आभार मानले.
