हिमायतनगर (वाढोणा), अनिल मादसवार| हिमायतनगर शहरातील ज्येष्ठ नागरिकांच्या न्याय्य हक्कांचे संरक्षण, त्यांच्या समस्या सोडविणे आणि त्यांना सन्मानाने जीवन जगता यावे, या उद्देशाने श्री परमेश्वर ज्येष्ठ नागरिक सेवा संघ, हिमायतनगर यांची बैठक १२ ऑक्टोबर रोजी उत्साहात संपन्न झाली. या बैठकीला प्रमुख अतिथी म्हणून अशोक तेरकर, तर प्रमुख पाहुणे म्हणून श्री परमेश्वर मंदिर संस्थानचे उपाध्यक्ष महावीरचंद श्रीश्रीमाळ आणि नागनाथ अक्कलवाड गुरुजी यांची उपस्थिती होती.
ज्येष्ठ नागरिकांनी आपल्या हक्कांबाबत जागरूक राहावे! बैठकीत अशोक तेरकर यांनी FESCOM च्या कार्याची सविस्तर माहिती देत ज्येष्ठ नागरिकांचे हक्क, त्यांच्यासाठी उपलब्ध असलेल्या विविध शासकीय सुविधा आणि ज्येष्ठांच्या प्रश्नांबाबत जागरूकतेचे महत्त्व विशद केले. ज्येष्ठ नागरिकांना त्यांच्या न्याय्य हक्कांची जाणीव असणे आवश्यक असून, त्यांच्या समस्या सोडविण्यासाठी संघटितपणे प्रयत्न करणे गरजेचे असल्याचे यावेळी अधोरेखित करण्यात आले.
बैठकीनंतर श्री परमेश्वर ज्येष्ठ नागरिक सेवा संघाची नवीन कार्यकारिणी गठित करण्यात आली. नवनियुक्त पदाधिकाऱ्यांच्या माध्यमातून ज्येष्ठ नागरिकांच्या समस्या प्रशासनापर्यंत पोहोचविणे, त्यांना न्याय मिळवून देण्यासाठी प्रयत्न करणे आणि त्यांच्या हक्कांचे संरक्षण करण्यासाठी प्रभावीपणे कार्य करण्याची अपेक्षा व्यक्त करण्यात आली.
यावेळी नवनियुक्त पदाधिकाऱ्यांचे अभिनंदन करून त्यांना पुढील सामाजिक कार्यासाठी शुभेच्छा देण्यात आल्या. ज्येष्ठ नागरिकांचा सन्मान, सुरक्षितता आणि त्यांचे न्याय्य हक्क जपण्यासाठी संघटना महत्त्वपूर्ण भूमिका बजावेल, असा विश्वास व्यक्त करण्यात आला. या बैठकीला हिमायतनगर शहर व परिसरातील सेवानिवृत्त अधिकारी, कर्मचारी आणि ज्येष्ठ नागरिक मोठ्या संख्येने उपस्थित होते.
