मुदखेड (प्रतिनिधी) तालुक्यातील महाटी-चेली मार्गावरील पुलावरून एक टिपर थेट गोदावरी नदीत कोसळल्याची धक्कादायक घटना घडली. या अपघातात वाहनातील एका व्यक्तीचा जागीच मृत्यू झाला असून चालक मात्र थोडक्यात बचावला आहे.
मिळालेल्या माहितीनुसार, सकाळच्या सुमारास भरधाव वेगात जाणाऱ्या टिपरवरील चालकाचे नियंत्रण सुटल्याने वाहन पुलावरून खाली कोसळले. अचानक घडलेल्या या घटनेने परिसरात एकच खळबळ उडाली. स्थानिक नागरिकांनी तत्काळ घटनास्थळी धाव घेत मदतकार्य सुरू केले.
अपघातात टिपरमधील एक जण नदीत पडून मृत्युमुखी पडला, तर चालकाने कसाबसा जीव वाचवला. जखमी चालकाला उपचारासाठी रुग्णालयात दाखल करण्यात आले आहे.
घटनास्थळी मोठ्या प्रमाणावर नागरिकांची गर्दी झाली होती.दरम्यान, या परिसरात अवैध वाळू वाहतुकीसाठी टिपर मोठ्या वेगाने धावत असल्याच्या तक्रारी वारंवार समोर येत आहेत. प्रशासनाच्या दुर्लक्षामुळे अशा घटना घडत असल्याची संतप्त प्रतिक्रिया नागरिकांनी व्यक्त केली आहे.
या प्रकरणी पोलिसांकडून पुढील तपास सुरू असून, अवैध वाळू वाहतूक आणि नियमांचे उल्लंघन यावर कठोर कारवाई करण्याची मागणी जोर धरत आहे.