नांदेड, अनिल मादसवार| “माणुसकीच्या भिंतीला जेव्हा मदतीचा हात लागतो, तेव्हाच समाज खऱ्या अर्थाने सुरक्षित होतो,” याची प्रचिती नांदेडमध्ये पुन्हा एकदा आली. येथील ‘श्री हजुर साहेब ब्लड सेंटर’मध्ये दत्ता गायकवाड यांनी आयुष्यातील तब्बल ८२ व्या वेळेस रक्तदान करत सेवाभावाचा अनोखा आदर्श समाजासमोर ठेवला.
थॅलेसेमियाने ग्रस्त असलेल्या चिमुकल्या ऋतुजा गायकवाड या बालिकेला ‘B+’ रक्ताची तातडीची गरज असल्याची माहिती मिळताच, कोणताही विलंब न करता गायकवाड यांनी रक्तपेढीकडे धाव घेतली. त्यांच्या या तात्काळ मदतीमुळे त्या निरागस जीवाला नवसंजीवनी मिळाली. लहान मुलीच्या चेहऱ्यावर परतलेली आशा आणि आनंद पाहून उपस्थितांनाही भावनिक क्षण अनुभवायला मिळाले. हे कार्य केवळ वैयक्तिक मर्यादेत न राहता ‘श्री स्वामी समर्थ ब्लड डोनर ग्रुप’च्या माध्यमातून व्यापक स्तरावर राबवले जात आहे.
थॅलेसेमियाग्रस्त बालकांना नियमित रक्तपुरवठा व्हावा यासाठी हा ग्रुप वर्षातून सहा वेळा विशेष रक्तदान शिबिरांचे आयोजन करतो. “भिऊ नकोस, मी तुझ्या पाठीशी आहे” या स्वामी समर्थांच्या विचारातून प्रेरणा घेत, ग्रुप माणुसकीचे नाते अधिक दृढ करण्याचा प्रयत्न करत आहे.
दत्ता गायकवाड यांच्या या कार्यामुळे समाजात सकारात्मक संदेश जात असून, तरुणांनीही पुढे येत वर्षातून किमान दोन वेळा रक्तदान करण्याचे आवाहन करण्यात आले आहे. थॅलेसेमियाग्रस्त मुलांसाठी काही मिली रक्तही ‘जीवनदान’ ठरू शकते, हेच या घटनेतून अधोरेखित झाले आहे.
समाजात माणुसकीची ज्योत प्रज्वलित ठेवणारे असे कार्य खऱ्या अर्थाने प्रेरणादायी ठरत असून, रक्तदानाच्या माध्यमातून सेवाभावाचा हा यज्ञ अखंड सुरू ठेवण्याचा निर्धार व्यक्त केला जात आहे.