नांदेड| राज्यात सुरू असलेल्या अर्थसंकल्पीय अधिवेशनाच्या पार्श्वभूमीवर ज्येष्ठ नागरिकांच्या प्रलंबित प्रश्नांकडे शासनाने तातडीने लक्ष द्यावे, अशी मागणी ज्येष्ठ नागरिक संघ फेडरेशन (फेस्कॉम) उत्तर मराठवाडा प्रादेशिक विभागाचे अध्यक्ष डॉ. हंसराज वैद्य यांनी केली आहे. ज्येष्ठांच्या मानधनासह विविध मागण्यांवर त्वरित निर्णय न झाल्यास राज्यभर तीव्र आंदोलन उभारण्याचा इशाराही त्यांनी दिला आहे.
डॉ. वैद्य म्हणाले की, विधानमंडळाच्या अधिवेशनात अनेक आमदारांनी ज्येष्ठ नागरिकांच्या समस्यांची गंभीरता मांडली आहे. नाशिक येथे झालेल्या ३५व्या राज्यस्तरीय ज्येष्ठ नागरिक अधिवेशनात सर्वानुमते ठराव मंजूर करून शासनाकडे सादर करण्यात आला होता. त्या वेळी उपस्थित मंत्र्यांनीही सकारात्मक निर्णयाचे आश्वासन दिले होते. मात्र अद्याप कोणतीही ठोस कार्यवाही झालेली नाही, याबाबत त्यांनी नाराजी व्यक्त केली.
राज्यातील ३६ जिल्ह्यांतून सुमारे चार हजार ज्येष्ठ प्रतिनिधींनी या अधिवेशनात सहभाग घेतला होता. त्यामुळे त्यांच्या अपेक्षा शासनाकडून वाढल्या असून त्या पूर्ण करणे आवश्यक आहे. विशेषतः ज्येष्ठांना सन्मानाने जीवन जगता यावे यासाठी मानधन योजना आणि इतर कल्याणकारी उपाय तातडीने राबविण्याची गरज त्यांनी अधोरेखित केली.
मुख्यमंत्र्यांना उद्देशून त्यांनी आवाहन केले की, ज्येष्ठांच्या प्रश्नांकडे सहानुभूतीने पाहून त्वरित निर्णय घ्यावेत. अन्यथा वाढत्या उन्हातही ज्येष्ठ नागरिकांना रस्त्यावर उतरून आंदोलन करावे लागेल, अशी परिस्थिती निर्माण होऊ शकते.
आंदोलनाच्या काळात कोणत्याही ज्येष्ठ नागरिकाच्या जीवितास धोका निर्माण झाल्यास त्याची संपूर्ण जबाबदारी शासनावर राहील, असा इशाराही त्यांनी दिला. शासनाच्या दुर्लक्षामुळे ज्येष्ठांना त्यांच्या मूलभूत हक्कांसाठी रस्त्यावर उतरावे लागणे ही अत्यंत वेदनादायक बाब असल्याचे त्यांनी नमूद केले.
ज्येष्ठांच्या सन्मान आणि सुरक्षिततेसाठी शासनाने तातडीने सकारात्मक निर्णय घ्यावेत, अन्यथा शांततेचा आवाज आंदोलनात परिवर्तित होईल, असे संकेत देत डॉ. वैद्य यांनी आगामी काळात लढा तीव्र करण्याचा इशारा दिला.