Gurudwara Board Meeting : अत्तापुर (हैदराबाद) येथील गुरुद्वारा सिख छावणीच्या जमिनीच्या वादावर तोडगा काढण्यासाठी गुरुद्वारा बोर्ड सक्रिय
नांदेड | तेलंगणा राज्यातील हैदराबाद येथील अत्तापुर परिसरातील गुरुद्वारा सिख छावणीच्या जमिनीच्या वादावर तोडगा काढण्यासाठी गुरुद्वारा बोर्डाकडून सर्वतोपरी प्रयत्न केले जाणार असल्याचे तख्त सचखंड श्री हजूर साहिब येथील माननीय पंज प्यारे साहिबान यांनी स्पष्ट केले आहे.
१५ मार्च २०२६ रोजी अत्तापुर, हैदराबाद येथील गुरुद्वारा सिख छावणीच्या सुमारे १.५ एकर जमिनीवर प्रशासनाने जप्तीची कारवाई केली. संबंधित जमीन गुरुद्वारा साहिबची असल्याचा दावा करण्यात येत असून या प्रकरणी न्यायालयात वाद सुरू होता. न्यायालयाचा निकाल गुरुद्वारा साहिबच्या बाजूने लागल्यानंतर काही स्थानिकांनी ही जमीन मंदिराची असल्याची तक्रार प्रशासनाकडे केल्याचे समोर आले. त्यानंतर प्रशासनाने कारवाई करत १.५ एकर जमिनीतून सुमारे १००० गज जमीन गुरुद्वारा साहिबकडे ठेवून उर्वरित जमिनीवर जप्तीची कारवाई केल्याची माहिती समोर आली आहे.
या कारवाईमुळे परिसरात काही काळ तणावाचे वातावरण निर्माण झाले. तसेच या प्रकरणी काही शीख नागरिकांवर पोलिसांनी गुन्हेही दाखल केल्याची माहिती मिळाली आहे. या पार्श्वभूमीवर १६ मार्च २०२६ रोजी तख्त सचखंड श्री हजूर साहिब येथे माननीय पंज प्यारे साहिबान यांच्या उपस्थितीत बैठक पार पडली. या बैठकीत गुरुद्वारा बोर्डाच्या वतीने तेलंगणा राज्याचे मुख्यमंत्री तसेच संबंधित वरिष्ठ अधिकाऱ्यांची भेट घेऊन हे प्रकरण लवकरात लवकर मार्गी लावण्यासाठी शिष्टमंडळ पाठविण्याचा निर्णय एकमताने घेण्यात आला.
दरम्यान, गुरुद्वारा बोर्डाचे प्रशासक डॉ. स. विजय सतबीर सिंह यांनी दूरध्वनीद्वारे या प्रकरणाची सविस्तर माहिती घेत संबंधित अधिकाऱ्यांना आवश्यक ती पुढील कारवाई करण्याचे निर्देश दिले.
या बैठकीला जत्थेदार संत बाबा कुलवंत सिंह, हेड ग्रंथी सिंह साहिब भाई कश्मीर सिंह, धुपिया सिंह साहिब भाई राम सिंह, भाई गुरदीप सिंह, भाई रणजीत सिंह, डेप्युटी अधीक्षक स. रविंदर सिंह कपूर, सहाय्यक अधीक्षक स. बलविंदर सिंह फौजी, कमिटी विभागाचे प्रभारी स. दर्शन सिंह तसेच गुरुद्वारा बोर्डाचे विधी सल्लागार स. जसपाल सिंह सुखमनी आदी उपस्थित होते.
