हिमायतनगर (अनिल मादसवार) हिमायतनगर शहर व तालुक्यातील वीजपुरवठा, रस्त्यालगत असलेले वीज पोल, डीपी हलविणे, वाढते वीजबिल तसेच शेतकऱ्यांच्या विविध समस्यांबाबत प्रशासनाने तात्काळ निर्णय घ्यावा. आणि अनधिकृत पद्धतीने केलेल्या कामाची चौकशी करून दोषीवर कार्यवाही करावी. या मागणीसाठी राष्ट्रवादी काँग्रेस पक्षाच्या वतीने दिनांक ९ मार्चपासून राष्ट्रवादी काँग्रेसचे तालुकाध्यक्ष वामनराव पाटील वडगावकर बेमुदत आमरण उपोषण करत असून त्यांच्या सहकाऱ्यांचा व अनेक शेतकऱ्यांचा उपोषणाला पाठिंबा मिळत आहे.
शहर व तालुक्यातील प्रलंबित प्रश्नांवर प्रशासनाचे लक्ष वेधण्यासाठी हे आंदोलन छेडण्यात आले असल्याचे उपोषणकर्त्यांनी सांगितले. एक्सप्रेस फीडर ३३ केव्ही लाईन शहर व गावाजवळून गेल्यामुळे नागरिकांच्या सुरक्षिततेचा प्रश्न निर्माण झाला असून, ती लाईन सुरक्षित अंतरावर हलविण्याची मागणी करण्यात आली आहे. तसेच शहरातील काही ठिकाणी रस्त्याच्या मधोमध असलेले वीज पोल व डीपीमुळे अपघाताचा धोका वाढत असल्याने ते तातडीने हटविण्यात यावेत, अशीही मागणी करण्यात आली आहे.
याशिवाय शहरातील वाढलेली वीजबिले, विनापरवाना करण्यात आलेली काही कामे, शेतकऱ्यांच्या शेतातील डीपी बसविणे, रोड क्रॉस सर्व्हिस कनेक्शन संदर्भातील अडचणी तसेच काही कर्मचाऱ्यांच्या कामकाजाची चौकशी करण्याची मागणीही आंदोलनकर्त्यांनी केली आहे. दरम्यान, महिनाभरापूर्वी करण्यात आलेल्या उपोषणावेळी प्रशासनाने चौकशी करून कारवाई करण्याचे आश्वासन दिले होते. मात्र अद्याप संबंधित दोषींवर कोणतीही ठोस कारवाई झाली नसल्याचा आरोप उपोषणकर्त्यांनी केला आहे.
त्यामुळेच अखेर पुन्हा एकदा बेमुदत आमरण उपोषणाचा मार्ग अवलंबावा लागला, असे वामनराव पाटील वडगावकर यांनी स्पष्ट केले. या आंदोलनाला शहरातील नागरिक व शेतकरी वर्गाकडून पाठिंबा मिळत असून प्रशासनाने तातडीने लक्ष देऊन समस्यांचे निराकरण करावे, अशी मागणी करण्यात येत आहे.
“तालुक्यातील शेतकऱ्यांची अनेक कामे महावितरणमध्ये बेकायदेशीर पद्धतीने करण्यात आली आहेत. खऱ्या शेतकऱ्यांना ताटकळत तर धनंदाडग्या शेतकऱ्यांना तात्काळ सुविधा दिल्या जातायेत. तालुक्यात शहरात पोल, डीपी, वायर तसेच अनधिकृत डीपी बसविण्याच्या झालेल्या प्रकरणाची सखोल चौकशी करून संबंधित उपविभागीय अभियंता व सहाय्यक अभियंत्यांवर कायदेशीर कारवाई झाल्याशिवाय हे बेमुदत आमरण उपोषण मागे घेणार नाही.” — वामनराव पाटील वडगावकर, तालुकाध्यक्ष, राष्ट्रवादी काँग्रेस (अजितदादा पवार गट)
