नांदेड/भोकर | विज्ञानाच्या युगात देश प्रगतीच्या वाटेवर असताना, समाजात आजही अंधश्रद्धेचे भयावह रूप कायम असल्याचे पुन्हा एकदा भोकर तालुक्यात उघडकीस आले आहे.
गुप्तधनाच्या हव्यासापोटी एका तरुणाला नरबळीच्या दिशेने ढकलण्याचा धक्कादायक प्रकार भोकर तालुक्यातील बल्लाळ शिवारात समोर आला असून, या प्रकरणी ५ जणांना अटक करण्यात आली आहे. बल्लाळ येथील एका शेतात गुप्तधन असल्याच्या अंधश्रद्धेतून हा थरारक प्रकार घडला.
मंगळवारी (दि. ४) रात्री आरोपींनी श्रीकांत बाजेकर या तरुणाला शेतात नेले. तेथे त्याला बळजबरीने कपडे काढायला लावून गळ्यात लिंबाची माळ घालण्यात आली. त्यानंतर लिंबू, मिरची, हळद, कुंकू, नारळ आदी साहित्य वापरून त्याच्याकडून तथाकथित अघोरी पूजा करून घेण्यात आली.
या अमानुष प्रकारामुळे श्रीकांत प्रचंड घाबरून गेला होता. दरम्यान, या घटनेची चर्चा गावात पसरताच त्याचा भाऊ सिद्धांत शेषेराव बाजेकर यांनी पोलिसांत धाव घेतली. पोलिसांनी तातडीने घटनास्थळी जाऊन पंचनामा केला व पूजेचे साहित्य जप्त केले.
नरबळीचा डाव? पोलिसांचा सखोल तपास
पीडित तरुणाला विवस्त्र करून अघोरी पूजा करायला लावण्यात आल्याने, हा नरबळीचा प्रयत्न होता का? असा गंभीर प्रश्न उपस्थित झाला आहे. गुप्तधनासाठी अशा प्रकारे माणसाच्या जीवाशी खेळ करण्याचा हा प्रकार असल्याने पोलिसांनी जादूटोणा विरोधी कायद्यासह अन्य गंभीर कलमांखाली गुन्हा दाखल करून तपास अधिक तीव्र केला आहे. या घटनेमुळे संपूर्ण भोकर तालुक्यात संतापाची लाट उसळली असून, अंधश्रद्धेविरुद्ध कठोर कारवाईची मागणी जोर धरू लागली आहे.
