माहूर/नांदेड| माहूर तालुक्यातील मौजे वायफणी या ग्रामपंचायतीचे थेट सरपंच सौ. गोकर्णा सुरेश अंकुरवाड यांच्या विरुध्द दाखल झालेल्या तसेच 16 सप्टेंबर 2025 रोजी तीन- चतुर्थांश (%) मताने संमत झालेल्या अविश्वास प्रस्तावाच्या अनुषंगाने नांदेड जिल्हाधिकारी यांच्या निर्देशानुसार माहूर तहसीलदार यांच्या अध्यक्षतेखाली शुक्रवार 26 सप्टेंबर 2025 रोजी सकाळी 10 ते दुपारी 1 वाजेपर्यत “विशेष ग्रामसभा” जिल्हा परिषद प्राथमिक शाळा वायफणी येथे घेण्यात येणार आहे. याबाबत वायफणी ग्रामपंचायत क्षेत्रातील नागरिकांना नोंद घ्यावी, असे आवाहन प्राधिकृत अधिकारी तथा तहसिलदार माहूर यांनी केले आहे.
या ग्रामसभेत विशेष ग्रामसभा घेण्याकरीता प्रचलीत नियमान्वये सभेची गणपुर्ती आवश्यक आहे.सभेच्या दिवशी अविश्वास ठराव संमत करण्याकामी शिरगणना करण्याच्या पध्दतीने साध्या बहुमताने त्यास अनुसमर्थन देण्यात येईल. या कामी दिनांक 1 ऑक्टोबर 2024 या अर्हता दिनांकावर आधारीत दिनांक 29 ऑक्टोबर 2024 रोजी प्रसिध्द करण्यात आलेली विधानसभेची मतदार यादी ग्राह्य धरण्यात येणार आहे. त्यानुसार ग्रामस्थांचा सहभाग नोंदविण्यात येईल.
सदर दिवशी विशेष ग्रामसभचे आयोजन हे फक्त अविश्वास ठरावावर चर्चा घेण्यास्तव केले जाणार असल्याने या दिवशी इतर विषयांवर चर्चा होणार नाही. विशेष ग्रामसभेत उपस्थित राहुन शिरगणना पध्दतीने मतदान केलेल्या ग्रामसभा सदस्यांच्या साध्या बहुमताने अविश्वास ठराव मंजूर झाला असेल तर सदरचा अविश्वास ठराव संमत झाला असे समजण्यात येईल. विशेष ग्रामसभेमध्ये उपस्थित राहुन मतदान केलेल्या ग्रामसभा सदस्यांच्या साध्या बहुमताने अविश्वास ठराव फेटाळला असेल तर सरपंच पद कायम राहील.
विशेष ग्रामसभा ही जिल्हा परिषद प्राथमिक शाळा वायफणी ता. माहूर येथे शुक्रवार 26 सप्टेंबर 2025 रोजी सकाळी ठिक 10 ते दुपारी 1 वाजेपर्यत आयोजित केली आहे. सदर विशेष ग्रामसभेस येतांना ग्रामपंचायतीच्या मतदारांनी सोबत राज्य निवडणूक आयोगाने विहीत केलेल्या पैकी ओळखीचा पुरावा सोबत बाळगणे आवश्यक आहे. मतदान प्रक्रिया संपल्यानंतर मतमोजणी दिनांक 26 सप्टेंबर 2025 रोजी जिल्हा परिषद प्राथमिक शाळा वायफणी ता. माहूर येथे होणार आहे, असे आवाहन प्राधिकृत अधिकारी तथा तहसीलदार माहूर यांनी प्रसिद्धी पत्रकाद्वारे केले आहे.
