कंधार, सचिन मोरे l कंधार नगरपरिषद अंतर्गत डॉ. बाबासाहेब आंबेडकर वाचनालयात दरवर्षीप्रमाणे यंदाही नवीन दिवाळी अंकांचे चार दिवसीय प्रदर्शन आयोजित करण्यात आले आहे. हे प्रदर्शन दिनांक 25 ते 28 ऑक्टोबर 2025 दरम्यान वाचकांसाठी खुले राहणार आहे.
कार्यक्रमाची सुरुवात वाचनालयाचे सहायक ग्रंथपाल मोहम्मद रफीक सत्तार यांच्या हस्ते झाली. यावेळी जेष्ठ पत्रकार सचिन मोरे, डॉ. शंकर धोंडीबा जोगदंड, माधव कांबळे, संजय कांबळे आदी मान्यवरांच्या उपस्थितीत दिवाळी अंक पूजन व पुष्पार्पण करण्यात आले.
या प्रदर्शनात बाल, महिला व प्रौढ वाचकांसाठी निवडक आणि वाचनीय दिवाळी अंक उपलब्ध करण्यात आले आहेत. यात आवाज, जत्रा, दीपावली शतायुषी, मौज, ज्योतिष तंत्र-मंत्र भन्नाट, हेर, एकच थरार, महाराष्ट्राची जत्रा, दहावी दिवाळी अंक, ग्रहांकित, अन्नपूर्णा आदी लोकप्रिय अंकांचा समावेश आहे.
या प्रदर्शनाचा लाभ अधिकाधिक वाचकांनी घ्यावा, असे आवाहन उपविभागीय अधिकारी तथा नगरपरिषद प्रशासक रामेश्वर गोरे, मुख्याधिकारी श्री. संदीप भोळे, आणि सहायक ग्रंथपाल मोहम्मद रफीक सत्तार यांनी केले. कार्यक्रमास वाचनालय कर्मचारी दत्ता ऐनवाड, मिलिंद महाराज, मोहम्मद समीर, श्रीमती वंदना फुले तसेच मोठ्या संख्येने वाचक उपस्थित होते.