हिमायतनगर,अनिल मादसवार | शेतकरी अडचणीत, लाभार्थी वंचित, विद्यार्थी त्रस्त आणि शासकीय कार्यालयांतील प्रलंबित प्रश्नांचा डोंगर कायम असताना प्रशासन नेमके करतेय तरी काय? असा थेट सवाल उपस्थित करत शेतकरी पुत्र वामनराव पाटील वडगावकर, दत्त पाटील पवार सोनारीकर आणि कल्याण पाटील वानखेडे पळसपुरकर यांनी तहसीलदारांना निवेदन देत प्रशासनाला २८ सप्टेंबर २०२६ पासून आमरण उपोषणाचा इशारा दिला आहे.
अल्प पावसामुळे खरीप पिकांचे मोठे नुकसान झाल्याचा दावा करत हिमायतनगर तालुका कोरडा दुष्काळग्रस्त जाहीर करावा, नुकसानग्रस्त शेतकऱ्यांना हेक्टरी दीड लाख रुपये मदत द्यावी आणि पीकविम्याचा लाभ तातडीने मिळवून द्यावा, अशी प्रमुख मागणी करण्यात आली आहे. सन २०२३ मधील रखडलेली पीकविमा प्रकरणेही तातडीने निकाली काढण्याची मागणी करण्यात आली आहे.
भूमिअभिलेख कार्यालयातील एका अधिकाऱ्याने शेतकऱ्यांशी गैरवर्तन केल्याचा आणि “बुटाने मारण्याची” भाषा केल्याचा आरोप निवेदनात करण्यात आला असून, याची चौकशी करून दोष आढळल्यास कारवाई करण्याची मागणी करण्यात आली आहे. पंचायत समितीतील घरकुल व इतर योजनांमध्ये लाभार्थ्यांकडून पैशांची मागणी होत असल्याच्या कथित तक्रारींची चौकशी करण्याची मागणीही करण्यात आली.
तालुका कृषी अधिकारी कार्यालयातील कारभार, शेतकरी मार्गदर्शन शिबिरांवरील खर्च, गोपीनाथ मुंडे शेतकरी अपघात विमा योजनेतील पाच वर्षांपासून रखडलेली प्रकरणे, तसेच दुय्यम निबंधक कार्यालयातील जादा शुल्क आकारणीच्या कथित तक्रारींची चौकशी करण्याची मागणी करण्यात आली.
कर्जमाफीपासून वीज जोडणीपर्यंत मागण्यांचा पाऊस – शेतकऱ्यांची सरसकट कर्जमाफी करून नवीन कर्जासाठी अनावश्यक अटी लावू नयेत, अशी मागणी करण्यात आली आहे. भारतीय स्टेट बँक व महाराष्ट्र ग्रामीण बँकेतील कथित दलाली तातडीने थांबवून दोषी आढळणाऱ्या अधिकारी-कर्मचाऱ्यांवर कारवाई करावी, अशी मागणीही निवेदनात आहे.
ग्रामीण भागातील वीजपुरवठा सुरळीत करणे, प्रलंबित वीज जोडण्यांसाठी कोटेशन प्रक्रिया सुरू करणे, घरकुल लाभार्थ्यांना नियमानुसार रेती उपलब्ध करून देणे, रेशनकार्डाच्या अडचणी दूर करणे, दिव्यांग व निराधारांचे रखडलेले मानधन देणे, रोजगार हमीची कामे सुरू करणे आणि विद्यार्थ्यांना पाठ्यपुस्तके वेळेत न मिळाल्याप्रकरणी जबाबदारी निश्चित करण्याची मागणी करण्यात आली आहे.
