उमरी, प्रतिनिधी| श्रावण महिन्याच्या पावन पर्वानिमित्त उमरी शहरात भव्य शिवमहापुराण कथा आयोजित करण्यात आली आहे. परमपूज्य आचार्य गजेंद्र चैतन्यजी महाराज यांच्या मधुर वाणीतून 18 ते 25 ऑगस्ट 2026 या कालावधीत दररोज दुपारी 1 ते 4 या वेळेत वामनतीर्थ महादेव मंदिर, उमरी येथे शिवमहापुराण कथामृताचा लाभ भाविकांना मिळणार आहे.
श्रावण महिन्यातील सोमवार आणि शिवभक्तीचे विशेष महत्त्व लक्षात घेऊन या धार्मिक कार्यक्रमाचे आयोजन करण्यात आले आहे. कथेदरम्यान आचार्य गजेंद्र चैतन्यजी महाराज शिवमहापुराणातील विविध प्रसंग, भगवान शिवांच्या दिव्य लीला, शिवभक्तांच्या प्रेरणादायी कथा तसेच आजच्या जीवनाला उपयुक्त असे आध्यात्मिक मार्गदर्शन करणार आहेत.
श्रावण महिन्यात शिवमहापुराणाचे श्रवण केल्याने मनःशांती, आध्यात्मिक समाधान आणि शिवकृपा प्राप्त होते, अशी भाविकांची श्रद्धा आहे. त्यामुळे परिसरातील शिवभक्तांनी कुटुंबासह मोठ्या संख्येने उपस्थित राहून या आध्यात्मिक सोहळ्याचा लाभ घ्यावा, असे आवाहन आयोजक समितीने केले आहे.
गेल्या अनेक वर्षांपासून आचार्य गजेंद्र चैतन्यजी महाराज हे कीर्तन, प्रवचन आणि धार्मिक कथांच्या माध्यमातून समाज-प्रबोधनाचे कार्य करत असून त्यांच्या ओघवत्या वाणीला राज्यभरातील भाविकांकडून उत्स्फूर्त प्रतिसाद मिळत आहे. उमरीतील या शिवमहापुराण कथेमुळे श्रावण महिन्यातील धार्मिक वातावरण अधिक भक्तिमय होणार आहे.
