हिमायतनगर (उत्कर्ष मादसवार) माजी मुख्यमंत्री तथा राज्यसभा खासदार अशोकराव चव्हाण यांनी हिमायतनगर येथील जाज्वल्य देवस्थान श्री परमेश्वर मंदिराला भेट देऊन श्रीचे मनोभावे दर्शन घेतले.या प्रसंगी त्यांनी सर्वांच्या सुख, समृद्धी आणि कल्याणासाठी प्रार्थना केली.
भाजपच्या पक्षीय कार्यक्रमानिमित्त अशोकराव चव्हाण हिमायतनगर शहरात आले असता त्यांनी शहरातील प्रसिद्ध आणि ऐतिहासिक श्री परमेश्वर मंदिरास भेट दिली. मंदिराच्या पवित्र परिसराच त्यांनी निरीक्षण करून श्री परमेश्वरांच्या चरणी नतमस्तक झाले. मंदिराच्या शेकडो वर्षांच्या ऐतिहासिक पार्श्वभूमी व धार्मिक महत्त्वाविषयी माहिती खासदार चव्हाण यांना जाणून घेतली.
या वेळी मंदिर समितीच्या वतीने त्यांचा शाल, श्रीफळ आणि श्रीची प्रतिमा देऊन सत्कार करण्यात आला. खासदार अशोकराव चव्हाण यांनी मंदिराचे उपाध्यक्ष महावीरचंद श्रीश्रीमाळ व समिती सदस्यांचे अभिनंदन करत मंदिराच्या कामकाजाचे कौतुक केले. “मंदिराची उत्तररोत्तर प्रगती होत राहो आणि अधिकाधिक भक्तांना श्री परमेश्वराच्या कृपेचा लाभ मिळो,” अशा शुभेच्छा त्यांनी दिल्या.
या प्रसंगी शहरातील राजकीय कार्यकर्ते, मंदिराचे संचालक, भाविक भक्त, तसेच पत्रकार मोठ्या संख्येने उपस्थित होते. मंदिर परिसरात या भेटीमुळे भक्तीभाव आणि आनंदाचे वातावरण निर्माण झाले होते.