नांदेड, अनिल मादसवार| गणपती उत्सवासाठी कोकणात जाणाऱ्या मराठवाड्यातील चाकरमान्यांसाठी दक्षिण मध्य रेल्वेने मोठी खुशखबर दिली आहे. नांदेड ते सावंतवाडी रोड अशी थेट विशेष रेल्वेसेवा सुरू करण्यात येणार असून, मराठवाडा प्रथमच थेट कोकणाशी रेल्वेमार्गाने जोडला जाणार आहे. गणपती उत्सवातील प्रवाशांची वाढती गर्दी लक्षात घेऊन गाडी क्रमांक 07659/07660 नांदेड–सावंतवाडी रोड–नांदेड TOD विशेष रेल्वे चालविण्याचा निर्णय घेण्यात आला आहे.
या विशेष गाडीमुळे नांदेड, परभणी, लातूर आणि मराठवाड्यातील प्रवाशांना कोकणातील आपल्या गावाकडे जाण्यासाठी मोठा दिलासा मिळणार आहे. विशेष म्हणजे प्रवाशांना पुणे, लोणावळा, कल्याण आणि पनवेलमार्गे रत्नागिरी, चिपळूण, कणकवली, कुडाळ, सावंतवाडी यांसारख्या महत्त्वाच्या ठिकाणी थेट पोहोचता येणार आहे.
नांदेडहून रात्री ८ वाजता सुटणार गाडी – गाडी क्रमांक 07659 नांदेड–सावंतवाडी रोड विशेष रेल्वे हुजूर साहिब नांदेड येथून १२ आणि १५ सप्टेंबर २०२६ रोजी रात्री ८ वाजता सुटणार असून दुसऱ्या दिवशी पहाटे ३.३० वाजता सावंतवाडी रोड येथे पोहोचणार आहे. परतीच्या प्रवासासाठी गाडी क्रमांक 07660 सावंतवाडी रोड–हुजूर साहिब नांदेड १४ आणि १७ सप्टेंबर रोजी सकाळी ७.३० वाजता सावंतवाडी रोडहून सुटेल आणि दुसऱ्या दिवशी सकाळी ११.३० वाजता नांदेडला पोहोचेल.
पुणे, कल्याण, पनवेलपासून कोकणापर्यंत थेट जोडणी – या विशेष रेल्वेला पूर्णा, परभणी, परळी वैजनाथ, लातूर रोड, लातूर, येडशी, बार्शी टाउन, कुर्डुवाडी, दौंड, पुणे, लोणावळा, कल्याण, पनवेल, पेण, रोहा, माणगाव, खेड, चिपळूण, संगमेश्वर, रत्नागिरी, राजापूर रोड, वैभववाडी रोड, कणकवली, कुडाळ आणि सावंतवाडी रोड येथे थांबे देण्यात आले आहेत. त्यामुळे गणपती उत्सवासाठी कोकणाकडे जाणाऱ्या प्रवाशांना वारंवार रेल्वे बदलण्याची कसरत कमी होणार असून, प्रवास अधिक सोयीस्कर आणि आरामदायी होणार आहे.
२४ डब्यांची भव्य विशेष रेल्वे – प्रवाशांची मोठी गर्दी लक्षात घेऊन ही गाडी तब्बल २४ डब्यांची असणार आहे. यात वातानुकूलित द्वितीय श्रेणी, वातानुकूलित तृतीय श्रेणी, स्लीपर क्लास, सामान्य द्वितीय श्रेणी आणि एसएलआर डबे असतील.
चाकरमान्यांना मोठा दिलासा! गणपती उत्सवासाठी मुंबई, पुणे आणि कोकणातून आपल्या गावी परतणाऱ्या चाकरमान्यांची मोठी गर्दी असते. मराठवाड्यातून कोकणात जाणाऱ्या प्रवाशांना आतापर्यंत विविध मार्गांनी रेल्वे बदलून प्रवास करावा लागत होता. मात्र, यंदा नांदेडहून थेट सावंतवाडीपर्यंत विशेष रेल्वे उपलब्ध झाल्याने हजारो प्रवाशांचा प्रवास सुकर होणार आहे.
दक्षिण मध्य रेल्वेच्या या निर्णयामुळे गणपती बाप्पाच्या उत्सवासाठी कोकण गाठणाऱ्या मराठवाड्यातील भाविक आणि चाकरमान्यांना मोठा दिलासा मिळाला आहे. प्रवाशांनी विशेष रेल्वेचे आरक्षण आणि अद्ययावत वेळापत्रक प्रवासापूर्वी तपासून या सेवेचा लाभ घ्यावा, असे आवाहन दक्षिण मध्य रेल्वेने केले आहे.
