हिमायतनगर, उत्कर्ष मादसवार| महाशिवरात्रीच्या पावन पर्वाचे औचित्य साधत हिमायतनगर शहरातील वॉर्ड क्रमांक ९ मध्ये प्रजापिता ब्रह्माकुमारी ईश्वरीय विश्व विद्यालय अंतर्गत गीता पाठशाळा तथा ‘ॐ शांती’ ज्ञान केंद्राची स्थापना करण्यात आली. चायल परिवाराच्या पुढाकारातून उभारण्यात आलेल्या या ज्ञान केंद्राचे उद्घाटन मान्यवरांच्या उपस्थितीत भक्तिमय वातावरणात पार पडले.
कार्यक्रमाची सुरुवात ध्वजारोहणाने करण्यात आली. त्यानंतर उपस्थित मान्यवरांच्या हस्ते फीत कापून गीता पाठशाळेचे औपचारिक उद्घाटन करण्यात आले. त्यानंतर दीप प्रज्वलन झाले. संपूर्ण परिसर ‘ॐ शांती’च्या घोषाने व सकारात्मक ऊर्जेने भारावून गेला होता. यावेळी शीतल दीदी व सिंधू दीदी यांनी ब्रह्माकुमारी संस्थेमार्फत दिल्या जाणाऱ्या सनातन ज्ञानमार्ग, आत्मशांती, नैतिक मूल्ये व जीवन परिवर्तनाच्या संदेशावर सखोल मार्गदर्शन केले.
श्री परमेश्वर मंदिर ट्रस्ट कमिटीचे उपाध्यक्ष महावीरचंद श्रीश्रीमाळ, नगरसेवक डॉ. राजेंद्र वानखेडे, श्यामजी रायेवार सर, यांनीही आपल्या भाषणातून गीता पाठशाळेचे समाजातील महत्व अधोरेखित केले.
या कार्यक्रमास पोलीस निरीक्षक अमोल भगत, हिमायतनगरचे उपनगराध्यक्ष विनोद गुंडेवार, अक्कलवाड सर, वऱ्हाडे सर, राजू रामदिनवार यांच्यासह शहरातील अनेक माताजी, भाईजी व बहनजी मोठ्या संख्येने उपस्थित होते.
अध्यात्म, शिस्त, सदाचार आणि आत्मचिंतन यांचा संगम असलेली ही गीता पाठशाळा नव्या पिढीसाठी मार्गदर्शक ठरेल, असा विश्वास उपस्थितांनी व्यक्त केला. कार्यक्रमाच्या यशस्वी आयोजनाबद्दल गजानन चायल यांनी उपस्थित सर्व मान्यवरांचे व नागरिकांचे आभार मानले.
महाशिवरात्रीच्या शुभमुहूर्तावर सुरू झालेली ही गीता पाठशाळा हिमायतनगर शहराच्या आध्यात्मिक व सांस्कृतिक जीवनात नवे तेज आणणारी ठरेल, अशी भावना व्यक्त करण्यात आली.
