उस्माननगर, माणिक भिसे| लोहा तालुक्यातील चिंचोली शिवारातील गोदावरी नदीपात्रात विनापरवाना सुरू असलेल्या अवैध रेती उत्खननावर उस्माननगर पोलिस व महसूल विभागाने मोठी कारवाई केली. कारवाई दरम्यान लोखंडी इंजिनांचे ५ संच आणि थर्माकॉलच्या १२ तराफ्यांसह एकूण २३,५०,००० रुपयांचा मुद्देमाल जप्त करून जागीच नष्ट करण्यात आला.
नांदेडचे पोलीस अधीक्षक अभिनाश कुमार यांच्या मार्गदर्शनाखाली सुरू असलेल्या ऑपरेशन फ्लश आऊट मोहिमेनुसार जिल्ह्यातील सर्व पोलीस ठाण्यांना अवैध रेती उपसा करणाऱ्यांवर कठोर कारवाईचे आदेश देण्यात आले होते.
त्या अनुषंगाने सहाय्यक पोलीस निरीक्षक संजय निलपत्रेवार यांच्या नेतृत्वाखालील पथक पट्रोलिंगदरम्यान मिळालेल्या गोपनीय माहितीवर तातडीने कार्यरत झाले. चिंचोली शिवारात धाड टाकल्यावर नदीपात्रातून लोखंडी इंजिन व थर्माकॉल तराफ्यांच्या सहाय्याने रेती उपसा सुरू असल्याचे स्पष्ट झाले.
कारवाईदरम्यान मंडळ अधिकारी शिवकांता पवार व ग्राम महसूल अधिकारी मोतीराम पवार यांनी प्रत्यक्ष पंचनामा करून सदर साहित्य शासन परवानगीविना वापरले जात असल्याचे नोंदवले. त्यानंतर संपूर्ण मुद्देमाल पंचासमक्ष जागीच नष्ट करण्यात आला. तराफे व इंजिन मालकांची माहिती घेऊन संबंधितांविरुद्ध उस्माननगर पोलिस ठाण्यात गुन्हा दाखल करण्यात आला आहे. अवैध रेती उपसा थांबवण्यासाठी केलेल्या या जलद आणि प्रभावी कारवाईबद्दल पोलीस अधीक्षक अभिनाश कुमार यांनी उस्माननगर पोलिस पथकाचे कौतुक केले आहे.
